舊時江湖賣藝嘅人，成日會帶住隻馬騮仔，周圍去表演做「馬騮戲」，靠打鬧、搞笑情節吸引觀眾，以賺取賞金；而耍馬騮嘅大多係北方人，所以廣東話有句俗語叫「外江佬舞馬騮」，意指天生係註定係畀人拎嚟舞。大家唔好意為「馬騮戲」已經隨著歷史消失咗，最近英國列斯（Leeds）就有新一齣戲碼，有港人組織喺嗰邊整色整水，同一眾「手足」搞「快閃人鏈撐立場新聞」活動。而最搞笑嘅係，個活動最後竟然因為現場有商戶投訴同報警就立即腰斬。原來佢哋係咁聽話㗎咩？喺洋人面前就變晒順民，乖乖咁比人舞？
被投訴即「閃」？
今次個活動真係無改錯名，用「快閃」嚟形容相當貼切，點解囍雨咁講？本身個活動預計搞一個鐘頭，點知因為有商戶報警，活動大約半個鐘到結束咗。成班人咁快閃咗去，仲講咩聲援啊？舉辦方本身仲講要借行動，繼續守護「香港人絕不退讓的立場」，依家有人報警，你哋就立即縮沙，自己都退讓成咁，仲點講守護香港啊？佢哋咁樣隔空做「馬騮戲」，想畀邊個人睇？如果唔係為活動被腰斬，搞出呢單鬧劇畀人恥笑，本身都無咩香港人會理佢哋，晒氣啦。
洋人說話才聽得入耳
以前班黑暴「手足」，喺香港就也文也武，去到英國做咩唔同晒？聲援《立場》唔係好重要咩？就算有英國當地商戶投訴你哋，點解唔繼續堅持，甚至係反抗？如果換轉係香港暴亂時期，班「手足」畀人咁對待，相信一早走去「裝修」刑毀破壞間舖頭，「私了」埋班店員啦！依家班英國警察阻住佢哋嘅行動，點解又唔去譴責英國破壞集會自由？又點解唔見佢哋有鬧英國警方係「黑警」，甚至用暴力對手段對抗，包圍當地警署？班英國「手足」們依家被投訴，竟然識乖乖聽話？當日暴亂期間，香港社會聲嘶力竭咁叫暴力分子收手，佢哋都無理會過，係咪洋人講嘢佢哋先聽得入耳？
「英國手足」今鋪比人恰到上心口，大大聲話要打國際線嘅走佬政客，點解好似無人出嚟幫佢哋發聲講說話？獲英國「庇護」嘅羅冠聰，好似暫時提都無提過呢件事。一邊係「手足」，一邊係自己係豢養自己嘅英國政府，兩邊都唔想得罪，所以粒聲都唔出？做牆頭草無問題，不過羅冠聰自己諗吓，班「手足」會點諗你？
原圖：「列斯手足連線」社交網站專頁
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論