《立場新聞》停止營運、多名前高層被檢控或者拘捕，所有思想稍和正常嘅香港人都必然額手稱慶。無他嘅，一個長年挑動矛盾同仇恨、多次以「專訪」為藉口去畀一眾香港逃犯宣揚自己理念嘅所謂「媒體」，結束營業對香港肯定係利大於弊。不過香港就係咁，總係有啲媒體要包拗頸，係要開埋啲古靈精怪嘅角度嚟為《立場新聞》護航，硬係要營造到警方國安處做錯事咁，背後到底有咩意圖呢？
唔知又學人評論？
囍雨講緊嘅，係某分自從《蘋果日報》結業之後就大升紙嘅主流報章。呢份報章今日有條稿，標題係〈眾新聞楊健興：網媒董事多「放手」 少干涉編務〉，記者採訪另一網媒《眾新聞》嘅董事兼「記協」前主席楊健興，叫佢講吓網媒董事嘅職責等等。本來呢個角度係冇乜問題嘅，問題係篇「報道」劈頭就引述楊健興話：「不了解《立場》內部運作，難以評論案件」。
大佬，仲有冇好笑啲添呀？剩係睇呢一句，已經知道呢篇「報道」係「零」價值啦，採訪楊健興係唔會畀到任何養分讀者囉，正常記者好應該收手唔再問落去，咁點解仲要刊出呢篇報道呢？楊健興又唔係《立場新聞》董事、又承認唔知道《立場》內部運作係點，咁佢憑咩評論《立場》董事平日有冇參與公司運作？佢自己做《眾新聞》董事就冇過問啫，唔代表人哋都冇喎！
董事責任 任重道遠
仲有一點，其實呢份主流報章同楊健興自己，到底明唔明白乜嘢叫做「法律責任」？楊健興喺報道中質疑，警方不太了解傳媒運作，不排除有人「可能覺得董事好似職位最大就要負責」。睇到呢度，實在不禁要問，到底楊健興同刊登呢篇「報道」嘅報章，知唔知做一間公司嘅董事，其實有乜嘢責任？根據公司註冊處嘅資料，身為公司董事首先一定要為整個公司嘅利益真誠行事；仲有要為咗適當目的而使用董事權力；另外，除咗獲得適當授權外，董事唔可以下放權力；而董事仲需要有獨立判斷能力等等。
簡單嚟講，公司董事係絕對有機會要為間公司嘅所作所為負責。就當《立場新聞》班董事真係傀儡都好，唔好意思呀，唔代表佢哋必然唔使負責。到底楊健興知唔知乜叫「責任」？連「責任」都唔識，學乜嘢人做公司董事呀？佢係太天真，定太傻？
小心跌入「陷阱」
《蘋果日報》同《立場新聞》相繼執笠，但老實講，不盡不實嘅評論其實仍然無處不在。香港市民真係唔好麻痺大意，以為呢兩間不良傳媒執咗，香港媒體就冇晒害群之馬，小心一個唔覺意跌入用「新聞」去包裝嘅誤導陷阱呀。
圖片來源：星島日報
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論