2021年就快完結，回望過去一年，大家聽得最多嘅，相信會係「解散」同埋「停止營運」。日前《立場新聞》多名現任或前董事，涉「串謀發布煽動刊物」罪被捕。《立場》同日宣布停止運作，遣散所有員工，仲刪除晒網站同社交媒體專頁嘅內容，終於正式「摺埋收檔」。《立場》喺「停運」嘅路上並唔孤單，之前包括《蘋果日報》、民間人權陣線、教協、支聯會、職工盟等，都喺今年之內先行一步，早已經「自我了斷」。反對派陣營樹倒猢猻散，多名亂港政客身陷囹圄，佢哋自己可有反省過，點解會有今日嘅下場？
《立場》與《蘋果》自作自受
《立場新聞》及《蘋果日報》同為傳媒，但一直以嚟，啲報道連基本嘅持平、中立都做唔到，有關反修例風波嘅內容，好多都係不盡不實。最離譜嘅係，《國安法》實施之後，似乎都唔見佢哋有收歛過。《蘋果》老闆黎智英所作所為，國安犯人李宇軒已經係法庭上供出咗部分細節，囍雨之前都寫過，所以就唔再重覆再講。
《立場》見到《蘋果》倒下，似乎都仲未汲取到教訓。雖然佢哋今年6月曾象徵性咁將之前嘅文章下架，多名董事又辭職，但係其後嘅報道依家踩界甚至過界，政府官員今個月初，都點名譴責過《立場》兩篇報道，包括妖魔化大潭峽懲教所「智慧監獄」管理模式、對前年中大二號橋暴動嘅，有煽動仇警情緒之嫌。既然啲報道去到咁盡，依家咪承擔返後果囉！
涉嫌違法 走上窮途未路
仲有「民陣」、「支聯會」呢啲政治組織，都係自己主動解散，與人無尤。至於點解要解散，佢哋心知肚明。「民陣」長年都無社團同公司註冊，合法性成疑；喺反修例風波期間搞嘅遊行集會，好多時都變成暴力衝突收場；「支聯會」綱領話要「結束一黨專政」，本身就有可能觸犯《國安法》，而「支聯會」前主席李卓人、副主席鄒幸彤等，正被控「煽動顛覆國家政權」罪。組織本身乃至高層人員都涉嫌違法，試問仲點可能營運落去？
至於教協同職工盟，前者包裝自己做教師專業團體，但係咪真係有落去保障教師同學生權益？過去不斷包庇失德教師，甚至有教師涉及反修例事件被捕或投訴，教協竟然搞籌款支援佢哋，呢種只問政見立場、不分青紅皂白嘅組織，仲有咩資格代表教育界？見到暴力示威者到處搗亂破壞，佢哋又有無譴責過？咁當然啦，職工盟都係一樣，近年同樣係政治掛帥，涉足政治事件之深，根本遠超勞工組織嘅範疇，十足政黨一樣。職工盟有31年歷史，如果唔係搞政治行歪路，又點會落得自行解散嘅下場？其實囍雨都有疑問，職工盟當日為何咁心急要解散？係咪有咩不可告人嘅理由，先要急急腳「執笠」？無論係教協定職工盟都好，其實佢哋就係最好嘅範例，當政治凌駕專業，不做好自身工作，到底會有咩下場！
原圖：網上圖片
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論