大家見到朋友家中的聖誕樹，應該唔會開口問主人家，到底買咗幾錢、係邊個人送。但點解走佬政客、通緝犯羅冠聰，喺社交網站Post咗一張個人照，身後有棵聖誕樹，竟然會有人向佢提問，到底係邊個畀錢買嘅呢？答案好簡單，歸根究柢係因為羅冠聰信唔過，大家都想知道佢啲錢點嚟。棵聖誕樹係咪屬於羅冠聰嘅、又值幾多錢，其實就唔係重點。關鍵在於，點解佢可以喺生活費咁高嘅英國生活，仲可以身光頸靚，周遊列國，甚至看似有閒情去「裝飾家居」。但係又一直都無清晰同正面回應過「錢從何來」，咁就唔好怪人哋去質疑你啦！
資金來源足證為誰人服務
羅冠聰雖然話張個人照係喺朋友屋企影，棵聖誕樹亦唔屬於佢，囍雨無從判斷亦無興趣知道係真定假，因為根本唔係重點所在。羅冠聰話自己係「基於價值同原則行事」，咁當然可以啦，但衣食住行樣樣都係錢，佢嘅生活費係點嚟？到底係咪有外國金主支持，甚至直頭包養緊佢，培養緊佢做「反中代言人」？我哋唔止要問聖誕樹幾錢，仲應該問羅冠聰，依家著緊嘅衫褲鞋襪值幾錢，有無人資助。只有知道佢嘅資金來源，或許就可以解答到，佢一直以來係為緊邊啲人服務，到底係為自己定係為緊香港人發聲。
「眾志」資金不知所蹤
咁當然啦，提到錢銀問題，羅冠聰都有一單要回應。舊年「香港眾志」解散，單計佢哋近年嘅眾籌項目，公開嘅款項都已經有幾百萬元之多。當「眾志」解散之後，嗰啲餘款又去咗邊到？前「眾志」秘書長黃之鋒就簡單拋低一句，自己無拎過、相信餘款係會「用得其所」及「得以貢獻公民社會」。假如黃之鋒無拎過，身為前「眾志」主席嘅羅冠聰，應該最清楚錢銀下落啦，點解相隔成年有多，都係無咩交代過？羅冠聰喺《港區國安法》實施前就離港、宣布退出「眾志」，之後就「風風光光」去到外國，繼續打所謂「國際線」，似乎真係相當可疑。
羅冠聰真係「幾醒目」，今次借聖誕樹一事轉移視線，但大家留意吓，佢都仲係無交代過，自己生活費邊到嚟。如果唔係「身有屎」，點解唔敢回應先？你話係屋企寄比你用、由朋友借畀你用，甚至話自己賺嘅都可以，但係連呢啲嘢都好似唔敢講咁？係咪隱藏緊啲咩？會唔會係佢唔想自己幕後金主曝光，畀人知有外國勢力泵水支持？或者唔想比手足知道，可能係拎緊大家眾籌啲錢去揮霍緊？到底真相係點，羅冠聰心知肚明啦。一日佢未交待清楚之前，大家都會繼續狙擊落去！
原圖：羅冠聰社交網站截圖
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論