其實嗰班走佬政客知唔知醜㗎？自己著咗草，甚至畀執法部門通緝，仲敢拎「香港人」身份招搖撞騙？張崑陽同羅冠聰喺社交網站高調宣布，聲稱自己今晚會做「香港證人」，出席台灣嘅立法院人權促進會舉辦嘅「香港的走向以及台灣的對應」聽證會。囍雨想講，其實個聽證會未開都已經估到佢哋想講咩啦，離唔開又係話俾港府打壓、什麼香港人權、自由受損嗰啲抹黑大話。大家不如估吓，佢哋有邊啲嘢唔會講、唔敢講？

不敢說的真相

2019年反修例暴亂期間，暴徒掟磚殺人、到處縱火、私了毆打市民、大量破壞公物及商店、向高等法院及終審法院門外掟汽油彈、恐嚇法官；仲有搞違法初選，鼓吹透過選舉奪權，計劃當選後無差別否決政府議案；不斷走去外國「告洋狀」，要求對方制裁港府官員，呢啲又會唔會講？

中國台灣嘅立法院議員應該撫心自問，會唔會容忍有當地政客，親自走去外國請求制裁台灣嘅行政機關？最起碼，囍雨真係無見過有台灣政客咁做囉！台灣都有所謂嘅「國安五法」，如果有人咁做，恐怕一早畀人拉咗啦。既然係咁，點解仲可以當張崑陽、羅冠聰係上賓咁看待？根本就係雙重標準。依家「台獨」議會同走佬政客行得咁埋，係咪密謀緊「兩獨合流」？ 

台灣議會另有所圖？

如果台灣嘅立法院議員對香港情況感興趣，根本就唔應該搵張崑陽同羅冠聰，佢哋有咩資格去代表香港？佢哋走佬離開咗香港一段時間，又點會知道依家社會實際情況係點？其實，香港剛剛選出新一屆立法會議員，有不少人都可以向台灣民眾講解本港嘅社會政經狀況，單計立法會選委會界別，就有9名議員有博士學位，又係經過選舉洗禮，有民主授權，絕對比羅冠聰等人有代表性得多。

台灣嘅議會今次邀請張、羅去講嘢，而咁多人唔請，選擇請佢哋兩個，肯定唔會係想知香港真實情況係點。相信本身就已經有既定目標，想佢哋講攻訐抹黑香港嘅故事，比藉口台灣當局繼續「打香港牌」。今次「兩獨」聯手，根本就係想搞「反中大會」。

羅冠聰同張崑陽呢啲政客最近咁得戚，不時周圍去演講上鏡，佢哋可唔可以先解答大家一條問題，到底依家係食邊個、著邊個，收邊個錢做嘢，又係咩國籍？佢敢唔敢同大家交代清楚？咩都唔講，仲好意思出嚟拎光環？

原圖：張崑陽 Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk