嘩嘩嘩！今日有單大新聞，警方成功搗破一個武器庫，搜出190支超過兩焦耳嘅氣槍、軍用防毒面具同濾罐、軍用級防彈板，以及反修例暴亂常用嘅煙霧發射器等；而最誇張嘅係，仲有11支預壓式高壓氣槍，其中一支高達2,000焦耳，破壞力強勁，性能比起步槍仲要高！警方拘捕嘅10人之中，有人曾參與過反修例暴亂。到底佢哋收埋咁多武器，係有咩目的，係想食「大茶飯」定係要搞暴力抗爭？唔通想喺嚟緊立法會選舉到搞事？最近Telegram仲有某煽暴群組，呼籲人喺平安夜搞「革命」，唔通兩者係有關連？

煽動襲警 「要孤狼變群狼」？

睇返Telegram個帖文，簡單嚟講，就係想叫「手足們」做好準備，喺平安夜發動暴力抗爭，仲有埋所謂「革命宗旨」、目標、行動地點、事前準備事宜。唔同崗位要做啲咩，都講到相當詳盡，仲慫恿他人去「裝修」（刑毀）店鋪、襲擊單落警員，甚至講到明要令「要孤狼變群狼」。囍雨就諗，佢哋講到要「革命」、「群狼」咁誇張，會唔會借煽動暴亂，再借機想發動恐襲？警方真係要調查清楚，到底行動係由咩人發起，佢哋有咩部署，手上有無武器？要及早將佢哋一網打盡。

認真事實 無謂再「送頭」

依家又破獲武器庫，又出現煽暴文宣，呢啲都係警號。雖然香港表面上風平浪靜，其實仲係危機四伏，滋事分子仍然死心不息，一有機會就想搞事反撲。但囍雨想同佢哋講，真係唔好咁天真啦，依家就算你哋出嚟搞暴力抗爭，都只會係去「送頭」。以前反修例暴亂期間，最勇武嗰批「前線手足」，似乎唔係坐緊監，就係潛逃海外走晒，證明暴力抗爭根本行唔通，到底仲有幾多人會咁傻，願意比人「老點」去衝，似乎都成問題！暴力示威行唔通，可能會轉為策動孤狼式恐襲，最近警方搜出嘅槍械，係咪為此而準備？不過又咁講，今次成功破獲武器庫，顯示警方情報同執法工作出色，違法者肯定走唔甩，陰謀亦唔會得逞。

囍雨每次見到呢啲煽暴帖文都會好嬲，「叫人衝，自己鬆」嘅事，實在見得太多，大家真係要諗清楚，係咪仲要被人利用？發文者可能身處海外，冷眼旁觀大家去犯法冒險，自己就做「鍵盤戰士」、「冷氣軍師」，行為極度卑鄙。又或者退一步講，發文者如果仲喺香港嘅，就必定會受到法律制裁。就好似之前Telegram群組「開掛之達人」嘅管理員，就因為喺反修例暴亂期間，煽動暴力同鼓勵不守法等，承認煽惑暴動、煽惑縱火等九罪，被重判58個月。既然有前車可鑑，咁多「手足」都衰咗，大家仲要去以身試法？

原圖：星島日報、TG截圖

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk