以為走咗佬就無事？唔好咁天真啦！廉政公署日前越洋通緝前立法會議員許智峯同前沙田區議員丘文俊，指佢哋涉嫌違反《選舉(舞弊及非法行為)條例》，涉及煽惑他人在立法會選舉投白票同不投票。佢哋兩個喺社交網站回應事件嗰陣，仲好囂張咁話，廉署執法只係變相幫「杯葛選舉計劃」做宣傳，仲講一大堆歪理，涉嫌犯法仲可以講到自己好似畀人「迫害」咁，真係無藥可救。

顛倒是非 亂說一通

無論係許智峯同丘文俊都好，仲係繼續話投白票、不投票係合法行為，批評話香港嘅所謂「獨裁政權」下，先會用刑事法律禁止。喂，講清楚先好喎，選民出於自己意願投白票或者唔投票，根本就唔會有違法問題；依家廉署執法係因為你哋煽動他人杯葛選舉，想影響選民投票意願，所以先會被指涉嫌違法。許、丘嘅講法完全係抹黑同誤導，去到咁樣地步仲想繼續呃人？係咪想香港「手足」同你一樣下場？

逃亡海外又如何？

許智峯同丘文俊 兩個，一個喺澳洲、一個喺英國，香港執法部門要拘捕佢哋當然唔容易，但有難度唔等於唔洗執法、通緝，呢個係基本法治精神。許、丘兩人唔好以為喺外國就無事，雖然依家英、澳暫時同香港暫停引渡協議，但係國際形勢瞬息萬變，邊個可以肯定日後外國政府唔會改變態度，將兩人遣返香港受審？目前香港仍然同10個國家有移交逃犯協定，例如韓國、捷克等，佢哋去到嗰啲地方仍然係有機會「出事」，唔洗咁「牙擦擦」住。

廉署今次通緝許、丘兩人，亦係畀社會嘅警示，如果有人涉嫌破壞選舉，就算係身處外國嘅人，同樣會嚴正執法，絕對唔會姑息養奸。想喺本地煽動他人投白票、搞「選舉抗爭」嘅人，更加唔洗旨意可以「走得甩」；如果有死硬派仲信許智峯，囍雨只能夠講一句，後果自負。大家應該有印象，上個月廉署就拘捕咗兩男一女，據報涉嫌喺網上轉載許智峯煽動投白票嘅帖文。許智峯同丘文俊自己一早鬆人，但係就叫人繼續搞「選舉抗爭」；就算連累有「同路人」被捕，許智峯都好似無講過一句「Sorry」。呢啲咁嘅人，大家仲要信佢哋？

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk