一個人離開土生土長嘅地方，選擇移民去外國生活，背後應該有好多原因，例如話想追求適合自己嘅生活環境，又或許好似攬炒派「手足」咁，因為有案在身而要著草走人。囍雨最近見到，有報道話香港大律師公會執委、公民黨主要成員黃瑞紅已經舉家移民到英國，但係又唔見到有交代點解要走，神神秘秘咁，唔通係另有內情？

與敏感組織關係密切

睇返黃瑞紅嘅背景，佢之前做過「中國維權律師關注組」常務秘書，同埋「香港人權監察」第二副主席，呢兩個組織係咩來頭，相信大家都好清楚。前者嘅「關注組」曾被傳媒揭發，向受美國政府資助嘅美國國家民主基金會（NED）申請資助，喺內地建立所謂「維權」組織，而今年警方引用《國安法》要求佢哋交資料，組織就急急腳解散；後者嘅「人權監察」，亦被指早前曾分別收取NED千多萬港元資助。黃瑞紅之前同呢啲敏感組織關係咁密切，移民係咪想撤清關係「保平安」？

反政治立場相當鮮明

黃瑞紅嘅政治立場亦相當鮮明，曾經喺2012年反國教運動中參與絕食，直到反修例暴亂期間，又繼續提供義務法律支援。而喺前年8.28嘅「反送中＃MeToo集會」，當日主題係「抗議警方性暴力」，黃瑞紅都有份站台發言。佢接受傳媒訪問，講到反修例暴亂就話覺得好辛苦同心痛，因為見到人權、公義、法治正在崩壞咁話。囍雨想講，黃瑞紅作為律師，當日見到暴力示威者破壞香港，都好似無發聲譴責同制止過，真係知道咩叫公義同法治咩？仲同埋班示威者一齊追究子虛烏有嘅所謂「警暴」，真係似政客多過似律師。其實佢覺得香港咁差，真係唔好勉強自己，移民走人就啱㗎啦。

囍雨諗起，大律師公會將會喺明年一月換屆，備受爭議夏博義講明唔連任主席一職，到依家黃瑞紅又移民，都應該唔會再競選。換言之，來屆公會管理層肯定會有新面孔加入，但如果將來公會路線都仲係好似依家咁，高度「政治化」嘅話，到底仲可以行到幾遠？一眾會員們，真係要好好諗清楚！

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk