近日，香港社會高度關注市區野豬出沒傷人嘅問題。漁農自然護理署尋日（17日）就聯同警方，喺香港仔深灣道採取咗「滅豬行動」，發射麻醉槍，最終一共捕獲咗7隻野豬，並即場以藥物注射人道毀滅。事後，一啲關注野豬人士非常激動，炮轟署方嘅做法「卑鄙」「血腥」，一些市民亦對署方行動提出種種質疑。一個保護市民安全嘅行動，更被造謠、抹黑為「警察對野豬嘅報復行動」。

惻隱之心，人皆有之。的確，正常人睇到野豬中麻醉槍倒下嘅片段，心入面係會感到唔舒服。不過，我地都應該冷靜了解清楚事情嘅本質——近年市區野豬出沒嘅問題，係有明顯加劇之勢，而過去幾年大約有30宗野豬傷人個案，政府係無理由唔採取行動。咁好多人都會問，點解署方唔肯用遷移、絕育呢啲方法？

漁護署變招迫不得已

實情係，漁護署試過但欠成效。以深灣道一帶為例，署方2018年至今，進行咗12次野豬捕捉及搬遷行動，先後將35頭野豬搬去偏遠郊野，並為當中27頭野豬避孕或絕育，但始終唔能夠有效控制野豬滋擾，部分野豬更係「重返現場」，對市民及道路使用者構成危險。因此，漁護署放棄「捕捉、絕育、放回」政策，改為以人道毀滅為目的嘅圍捕行動，實在係迫不得已，亦都係顧及市民嘅人身安全。

又有人問「即捕即殺」係唔係太唔人道？筆者睇返世界各地好多地方，其實都係以獵殺方式處理野豬。依家署方先以麻醉槍捕獲野豬，再用藥物作人道毀滅，已經最大程度減輕對野豬嘅折磨，算係比較人道嘅方法，亦都係短時期內處理市區野豬出沒傷人嘅有效方法。

日後再研究其他方法

政策並非一成不變，而係要與時並進。筆者同意，當市區野豬出沒問題穩定落黎，政府就應該著手研究其他方法，但目前當務之急，就係要盡最大努力，阻止野豬再次喺市區傷人，畢竟野豬唔係黃絲口中嘅「手足」，更唔識分「黃藍」，你同我隨時都會有機會「中伏」。如果唔好彩，有老人家、小朋友畀野豬攻擊，後果真係不堪設想。更重要嘅係，唔諗其他有效方法，任由野生動物攻擊人類，繼而引起民眾對某類動物嘅仇恨，到時追住佢地喊打喊殺，亦都唔係保障動物嘅最佳方法。保障動物權益，絕不能走向極端、不分黑白，要識得平衡返人類安全，咁先係一個安全、文明、動物友善嘅社會嘅應有態度。

野豬事件亦見仇警思想

無可否認，一場反修例暴動撕裂咗香港社會，唔少人看待一般社會事情，仍然流露著明顯嘅政治情緒，失去咗客觀同理智，變得是非不分。以今次事件為例，一啲人即時聯想到，「因為野豬咬傷一名警察，就被警察報復」，又有人對警員受傷幸災樂禍，甚至叫野豬係「手足」。事件背後反映咗一啲人嘅仇警思想，並唔係保護野豬咁簡單。

事實上，相關政府部門都應該關注其他具危險性嘅野生動物，盡快同保護動物團體開展有效溝通，一齊搵出有效益、人道又平衡到公眾安全嘅解決方法，唔好拖到發生嚴重意外之後，先至臨急抱佛腳，咁樣就可以平衡到各方嘅權益。

原圖：《星島日報》

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk