反對派真係好識講故事包裝，就算係走人移民去外國都好，都要講到有幾咁為難、幾唔情願，但既然係咁，點解仲要走？公共醫療醫生協會前會長馬仲儀最近接受傳媒訪問，話已經移民咗去英國，仲喺當地繼續做醫生，但就唔捨得香港嘅光景，過到英國有啲「逃離」嘅感覺。馬仲儀要移民，當然係好行夾唔送，佢走無問題，但係睇到佢解釋點解要移民嘅理由，真係得啖笑囉。

政治凌駕專業？

簡單啲講，馬仲儀話移民係因為難以接受香港政治社會轉變，政治決定凌駕科學專業，仲話「香港太低氣壓了，看不到自己希望見的風景」。講真，如果講到政治凌駕科學專業，馬仲儀認第一，應該都無人敢認第二。佢到底期待見到香港出現咩「風景」？社會愈亂就愈好？

當日反修例風波期間，馬仲儀仲做緊公共醫療醫生協會會長嗰陣，已經成日偏幫暴力示威者。就好似前年荃灣暴動案，涉嫌參與其中嘅中學生曾志健被警員槍傷，之後公共醫療醫生協會發聲明譴責警方，話係咩「蓄意射傷市民」，又批評政府係「以武力消滅年輕人」。明明有暴力示威者搞事在先，有警員被圍毆倒地，危急之下先開槍制止，點解又變成執法者有錯？身為醫護組織，聲明竟然係從政治角度出發，一啲都唔中立，如果有基本良知，又點會講得出呢啲嘢？

將抗疫問題政治化

仲有，去年新冠疫情反覆，馬仲儀一邊話本地醫療人員工作壓力大，但又反對內地醫護來港馳援；之後當局推出社區普及檢測計劃，佢又質疑成效，表態話唔參與唔協助。到今時今日已經證明，全民檢測係抗疫必要工作，搵出社區傳播鏈相當有效嘅方法。就算去到最近，馬仲儀都仲反對當局強制醫護人員接種疫苗，甚至形容係「道德綁架」，咁醫護企喺抗疫前線，感染風險相對較高，為保障自己同病人，本身都應該打針。如果係重視醫護專業精神，又點會反對？

囍雨亦都見到，有傳媒話馬仲儀決定移民，可能係同公院醫護人員或許將要宣誓有關。馬仲儀之前極力反對要醫護宣誓，唔知係咪佢知道自己可能過唔到關，或者怕違誓有後果。反正佢之前咁「出位」，喺醫學界都「出晒名」，不如一了百了移民走人，喺外國重新開始算數？不過點都好，馬仲儀既然覺得香港係咁差，記得千祈唔好返嚟，留喺英國睇你想睇嘅「風景」啦！

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk