近排香港社會成日講移民潮，但市民見得最多嘅，其實係自從《港區國安法》實施之後，一大班攬炒派因為驚要負刑責，一窩蜂咁著草去外國。其中，前香港大專學界國際事務代表團成員嘅美國公民邵嵐，日前就同公民黨前主席嘅所謂學者陳家洛，齊齊喺一個網上論壇到「隔空對話」，聲稱要傾「香港民主倒退」同港人「去留」問題。囍雨一聽，唓，原來又係以往嘅套路，所謂移民問題只係表面，實際上又係講埋晒啲歪理，不斷抹黑香港司法、政制環境，繼續危言聳聽

又借機呼籲外國制裁

先講講一直好支持反修例暴動嘅邵嵐。佢本身擁有美國國籍，加上已潛逃海外，講嘢就更加偏激。邵嵐提到，近日支聯會解散、首名「國安犯」唐英傑重判9年等，借機呼籲英國、加拿大等制裁中國同港府官員；又話「壹傳媒」老闆黎智英同6個集團前高層，都因為涉「串謀請求外國制裁」被起訴，叫海外港人呼籲外國制裁香港，繼續「奮戰」。

邵嵐提出嘅所謂例子，根本完全唔合邏輯。支聯會綱領提出要結束中國共產黨領導，主張本身就違反中國憲法，亦不合乎香港《基本法》要求，老早應該被取締；而唐英傑被重判，除咗涉及展示「港獨」嘅「光時旗」，仲策動咗襲擊警員嘅恐襲，兩項罪名加埋必然會重判；黎智英就更加唔洗講，「12瞞逃」之一嘅李宇軒之前已經招認晒，黎智英係攬炒派登報呼籲外國制裁行動嘅幕後金主，人證物證俱全，被起訴自然係理所當然。邵嵐叫海外港人呼籲制裁，肯定已經違反《國安法》，佢仲敢叫其他人去做，真係擺明靠害。

司法保持獨立 維護國安乃憲制責任

同邵嵐「對話」嘅陳家洛亦不遑多讓，佢話喎，香港已經走向「專制極權」，連司法系統都逐步實行「嚴刑峻法管治」，又叫港人要「克服恐懼」。陳家洛話就話係浸大副教授，但骨子裡都係反對派政客，睇嘢都係先入為主，一啲都唔客觀。首先，香港司法系統根本冇問題，英國最高法院院長、香港終審法院海外非常任法官韋彥德，早兩個月先講過，香港好大程度維持司法獨立、裁決符合法治。當法律界重量級人物都咁講，陳副教授到底質疑緊咩呢？ 

仲有，陳副教授口口聲聲話香港有「嚴刑峻法」，囍雨相信係因為近期有好多反修例暴動案被告被重判，所以佢先有咁嘅錯覺。但事實上，都有唔少暴動案被告脫案，咁就證明法庭判案一直都係講證據，冇做過嘅自然會還佢哋清白。至於判刑輕重問題，暴動涉及嚴重破壞社會安寧，就算喺外國一樣係嚴重罪行，更何況係呢種咁大規模嘅暴亂，判刑點都唔會輕啦。仲有，陳家洛又點解無同外國人講清楚，香港自回歸廿十多年嚟，一直都未有履行憲制責任去就維護國家安全嘅23條立法呢？ 

政客講嘢無句真，睇佢哋嘅行動最實際。如果香港真係咁「危險」、咁令人「恐懼」，陳家洛仲唔第一時間走人過外國咩？佢太太係波蘭人嚟，佢自己亦識多國語言，要移民真係簡單過簡單，仲留得喺到，即係反正香港仍然好安全，亦非常包容好似佢咁嘅「偽學者」！事實係，《國安法》條文相當清晰，法律界線好明確，再唔係就睇吓《釋義及通則條例》，唔好做關於擁護《基本法》要求中「負面清單」嘅行為，根本就無嘢好怕。

原圖：

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk