一年一度體育盛事「渣打馬拉松」，去年因新冠疫情而停辦，幾經波折，今個星期日將會復辦實體賽喇！不過，據聞竟然有人想借機搞事，疑似要將賽事變成「抗爭」場地。話說，過去一直支持反修例暴動、「黃店」老闆周小龍，喺社交網站發文話，要向「渣馬」跑手送「香港加油」藝術字體燙畫，畀人印喺跑步戰衣上面；佢仲講到明「到時一齊撞吓衫」同「終點見」。囍雨真係唔明，點解硬係要將政治混入「渣馬」？如果其他人聽周小龍講，最後出咗事，佢係咪負責得起先？

「香港加油」為攬炒派暗語

雖然話「香港加油」呢四個字，表面睇上去係幾中性，但實際上，喺反修例暴亂之後，攬炒派就將呢句說話變成暗語，用嚟鼓勵「同路人」。如果有政治目的咁公開同集體展示呢種「政治標語」，到底會唔會有違法風險，囍雨都唔敢肯定，想響應同參與行動嘅人真係要自己衡量吓。不過又咁講，撇開法律問題，跑手如果喺賽事做政治表態，有機會違反參賽規則，到時連比賽成績都DQ埋，就真係喊都無謂。

再延伸咁講，如果有跑手再「激進」嘅，公開展現「光時」口號的話。就好似之前法庭判決都有講明，「光時」係特定時空同場合，係帶有「港獨」意味，有機會違反《港區國安法》，警方到時一定會嚴正執法，真係唔好亂嚟。

精人出口、笨人「著上身」？

睇返成件事，囍雨只有一個感覺，就係「精人出口，笨人出手」。周小龍真係「醒目」，喺背後派燙畫、發帖文呼籲人哋響應行動；自己就隔岸觀火，其他人就要冒住法律風險，著件有政治標語嘅戰衣上身。假設到時真係玩出火，甚至被人拘捕，承受後果嘅係自己！係咪真係要聽周小龍「老點」，大家真係要好好諗清楚，唔好嘗試去挑戰法律底線。

以往已經有唔少「例子」，好似前「賢學思政」召集人王逸戰，都曾經好囂張咁講，組織嘅「存在價值就是去試探政權紅線」。結果呢？組織骨幹相繼涉嫌觸犯《國安法》被捕，王逸戰亦涉及串謀煽動顛覆國家政權，依家被押緊、身陷囹圄，「賢學思政」亦落得解散收場。所以話，《國安法》真係唔可以講玩，違法後果相當嚴重，不容許測試法律紅線。

囍雨真係希望，大家尊重其他參選者，唔好以政治，污損咗「渣馬」呢項年度盛事。最重要嘅係，「渣馬」主辦方今日已經發咗嚴厲聲明，譴責有人將「渣馬」作為宣揚及鼓吹政治嘅平台，如果發現比賽期間發現違法行為，會按需要要求執法部門介入。見到主辦方都咁講，大家唔好再心存幻想，諗住做啲踩界嘢啦！

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk