「台灣殺人案」死者潘曉穎嘅媽媽，日前透過網台發布錄音，邀請案中疑犯陳同佳及保安局局長鄧炳強等，聽日去到政府總部「面對面問清楚」。見到潘媽媽鍥而不舍咁去為女兒討回公道，真係覺得好心酸，亦好同情佢一家嘅遭遇。之不過，以事論事，潘媽媽個焦點其實係擺錯咗，佢要求陳同佳出嚟交代，囍雨當然無意見，但如果係針對港府同保安局，其實完全係對錯焦！事實係，陳同佳去唔到台灣自首，罪魁禍首係台灣嘅民進黨政府玩政治，一直唔同意簽發入境證畀陳同佳所致。潘媽媽要怪責、施壓嘅對象，應該係專搞「台獨」嘅民進黨政府先啱！

台灣刻意阻撓 陳同佳無法成行

陳同佳前年10月因洗黑錢案刑滿出獄後，曾經公開承諾赴台自首，而協助佢嘅聖公會牧師管浩鳴亦多次強調，陳同佳自首意向無變。然而，陳同佳要去台灣自首，唔係買張機票就得，而係要先同台灣申請簽證；但係，台灣當局一直拒向陳同佳發簽證，如果連網上申請簽證唔批，相信落地簽證更加無望。陳同佳無有效嘅赴台簽證，航空公司就唔能夠畀佢上機；如果航空公司夾硬做，可能會被台灣當局追究、罰款，仲要負責埋將未能入境嘅陳同佳，由台灣遣返回香港，所以根本就行唔通。

台灣當局掌握檢控證據

依家台灣民進黨政府一直堅持，話必須要同香港政府直接談判有結果，先至畀陳同佳去台灣自首。但係囍雨就唔明啦，其實成單案都係喺台灣發生，不論係兇案現場嘅搜證、陳同佳拖住藏有潘曉穎遺體嘅行李箱，離開事發酒店嘅閉路電視片段，甚至係受害人嘅驗屍報告等物證，一直係掌握喺台灣警方手上。只要陳同佳能夠去到台灣，相信台灣執法部門夠晒證據去檢控佢。如果民進黨政府唔係玩政治手段，一早畀陳同佳入境，成件事早已經完滿解決咗，就唔洗令到潘媽媽受長期受到呢啲咁不必要嘅煎熬。

無論係囍雨或者其他香港人，都好體諒潘媽媽，知道佢想還女兒公道，想早日沉冤得雪嘅心情。但如果潘媽媽只係繼續向處於被動嘅港府施壓，根本只係無濟於事。陳同佳涉嫌喺境外殺人，香港無司法權處理，而佢涉及嘅洗黑錢案，已經刑滿出獄，喺法津同現實層面上，佢已經係「自由人」，可以隨心行動同生活，港府無角色去干預或干涉。潘媽媽若然想早日討回公道，不如直接隔空向台灣民進黨政府喊話，叫佢哋拎返個良心出嚟，唔好再諸多阻撓，以伸張公義法治為先，放低一切政治考量，畀陳同佳入境自首，咁樣可能仲有用。

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk