參選立法會與否，呢一個咁簡單嘅問題，民主黨搞咗咁耐終於有答案。民主黨本身將參選問題，推晒落黨員身上；有意參選嘅人先要過五關斬六將，必須喺所屬地區支部其餘4個支部，合共拎到40個有效提名，再交比黨內中委會開會決定。「入場」門檻可以話係高到離譜，民主黨擺明唔想黨友參選，等「參選派」知難而退。結果民主黨真係「求仁得仁」，黨內參選提名期結束，無收到任何黨員提交報名名單，換言之，民主黨將會缺席今屆立法會選舉。囍雨想講，民主黨作為政黨，如果唔參選仲有咩存在價值？不如早日解散咗佢吧啦！

有黨員欲參選 卻不敵高門檻

民主黨今次唔參選，係咪代表黨友真係唔想選？當然唔係啦，有報道就話，其實新界西支部成員韓東方聲稱會參選，但因為最終只係拎到9個提名，根本無辦法參加黨內甄選。仲好笑嘅係，民主黨主席羅健熙仲堅持參選門檻「十分合理」，　咁囍雨想問，如果唔係有意為難黨員，點解今次唔沿用舊嘅甄選機制去做？民主黨如果係咁唔想黨員參選，點解唔坦白講？依家嘅做法，擺明想打壓黨內嘅「參選派」，但又要扮到好「民主」咁，真係好肉酸囉。

影響力不斷萎縮 政黨前途暗淡

更大嘅問題係，依家民主黨唔派人參選立法會，咁個政黨仲有咩政治話語權、政治影響力可言？仲有喎，大家唔好唔記得，最近仲有不少民主黨區議員先後辭職、宣誓無效被DQ，就算係地區議政層面，政治力量都已經大不如前。民主黨作為政黨，參政議政應該係最大目標，既然做唔到，已經無任何存在意義。班贊助人見到民主黨咁樣，連同佢哋「發聲」都隨時做唔到，仲點會願意再「課金」支持？當無錢、無人撐，民主黨仲點走落去？黨員仲留喺到有咩意思？

囍雨覺得，民主黨可能認為唔參選，想做到「杯葛選舉」嘅效果，表態比支持者同政府睇。如果真係咁，民主黨真係要醒醒，佢哋到底係咪參選，其實無人會在乎，亦都影響唔到成個選舉制度。其實民主黨近年真係錯晒，放棄昔日較溫和理性嘅立場，轉走激進路線，令到自己依家再無立足之地；假若民主黨仲想繼續發展，真係要好好反省吓，做啲實質嘅改變比大家見到，同反中亂港及暴力分子割席，否則可以斷言，他日就算有黨員參選，可能都過唔到資格審查呢一關。

 原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk