囍雨今日睇新聞，見到美國德州一間高中發生槍擊案，而最恐怖嘅係，疑兇竟然係一名18歲嘅學生。據報佢喺課室同其他人發生衝突，突然拔槍開咗2至3槍，造成至少4人受傷，其中有2人中槍送院。美國嘅槍擊案真係發生得好密，翻查資料，原來2020年美國有高達超過600宗導致4人受傷或死亡嘅大規模槍擊案；而今年單位頭半年，就已經發生咗逾230宗。囍雨見到呢啲數字，真係百感交集，被視為「自由民主大國」嘅美國，竟然連治安問題都控制唔到，槍擊案繼續無止境咁發生。如果連基本人身安全都保障唔到，仲講咩人權、自由？

民主絕非「能醫百病」

囍雨實在唔明白美國政府到底點諗，槍擊案頻生呢個問題，唔係今時今日先出現，點解咁多年嚟都制止唔到？雖則話美國憲法保障國民擁槍的權利，但呢種權利並唔係絕對，政府係可以施加一啲嚴格限制，搞極都搞唔到，到底美國班政客哋係咪真係重視國民嘅生命安全？

就算唔講槍擊案，睇返呢兩年新冠疫情肆虐，美國抗疫不力，成為全球疫情最嚴重嘅國家，至今已有超過70萬國民染疫死亡。證明民主唔等於可以解決所有社會問題，美國亦絕對唔係香港反對派、外媒，口中所形容嘅「烏托邦」，各種各樣社會問題、內部矛盾已經存在多年，一樣係無辦法根治。

美式民主經常強調「自由」、「人權」，但大家可知道，最大嘅人權喺咩？答案係生存權，睇返美國嘅情況，普通民眾可能只係行出街、返學，都隨時有危險！唔係囍雨誇張，其實早兩星期左右喺田納西州，先啱啱發生完超市槍擊案，造成至少2死12傷，槍手行兇動機仍然未明；就算唔係捲入槍擊案，依家美國疫情咁嚴重，出街一不留神，隨時會啲畀唔戴口罩、隱藏喺社區嘅新冠患者感染，同樣係防不勝防。

政治環境改變 邁向良政善治

美國係咪咁「好」，相信大家都心中有數。囍雨最反感嘅係，反對派成日要求香港「照搬」美式民主嗰套去做，但係刻意隱瞞晒所有缺點，不斷喺到自欺欺人。無論係咩政治體制，最重要係人民能否從中受惠，生活過得係咪安全、幸福，如果連呢一點都做唔到，仲有咩好講？最近香港政治環境有變，選舉制度都有改革，於是有部分人就覺得唔滿意，甚至形容係「倒退」。囍雨想問，以往反對派政客喺立法會拉布，癱瘓議會運作，關乎民生嘅法律草案都被一拖再拖，令市民久久未能受惠，咁樣對社會嚟講有咩好處？

正如特首林鄭月娥都有講到，新一份《施政報告》提出嘅「北部都會區」，如果係三年前做肯定會焦頭爛額。就係因為依家政治生態穩定， 政府先至可以乘勢而上，主動推出更出政策構想、發展方案。依家香港在新政制之下，「一國兩制」終於回到正確軌道，加上中央對香港發展、解決民生的無限支持，困擾港人的房屋、土地等問題，必定能迎刃而解。相比起所謂嘅民主國家，就連國民性命都保障唔到，試點又保障人民嘅福祉？到底有咩值得學習嘅地方？

原圖：中新社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk