「反水貨」暴走既惡行，過去幾日已經有唔少人批評，囍雨喺度就唔再多講喇，反正呢班人已經神憎鬼厭，講多都費事。之不過咁，好日唔聽電台節目既囍雨，今朝心血來潮打開收音機，唔聽猶自可，聽完把幾火，嗰個熱血公民鄭松泰發表埋啲九唔搭八既歪理，總之錯既只有人哋，班暴徒做乜都一定啱晒，捩橫折曲到極致，真係令人大開眼界。

佢講咩呀，嗱，舉例唔使多，剩係兩、三個已經睇到佢幾咁癲。佢話喎，示威者係「受害者」亦係「弱勢社群」，唔應該「抹黑」佢哋做暴徒，亦唔可以用「聖人」既道德標準去要求佢哋喺行動時認清邊個係壞人。聽到佢咁講，大家有咩諗法呢？囍雨就諗得好簡單：乜原來世界上只有「聖人」先唔踢人、推人、鬧人同打人架咩？乜正常人行出街會無啦啦踢人架？會無啦啦鬧個阿媽，搞到同行既小朋友喊？「普通」人有普通既行事標準都會咁做囉，唔該晒。

第二，佢又提到喎，發生「反水貨」行動既責任在政府，而維持秩序既係警方，主流媒體將示威者既「個別行為」放大喎。哈，好笑喇，乜嘢叫做「個別行為」呢？記得「佔領」行動既時候，全港三萬幾個警察，咪又係得嗰幾個疑似失控。你班暴徒當時唔知又有冇將啲「個別行為」無限放大呀？唔知咁樣又算唔算「識得話人，唔識話自己」呢？

最後，鄭松泰話喎，「反水貨」既激進示威者係「挺身而出，維護社區」。哈，講到佢咁，除咗話佢厚顏無恥到極點，都唔知可以講乜。如果鄭松泰咁講都成立既話，咁當日佔領期間，有疑似黑社會去毆打「佔領者」都冇問題啦，佢哋都係「挺身而出，維護社區」之嘛？咁講又得唔得先？

聽講，阿鄭松泰先生係「博士」嚟架喎，而家仲喺大學教書添，讀書咁多既人，講嘢同做嘢一啲都冇邏輯嘅，老實講，囍雨真係替香港既下一代擔心囉。

原圖：大公報