喺反修例暴動期間，攬炒派有一堆「動聽」嘅口號，什麼「齊上齊落」、「核爆都唔割」。依家睇返，其實真係得啖笑，所謂嘅攬炒派、政客「手足」，有事就第一時間鬆人著草過外國；咁樣都唔止，上星期五（10月1日）喺英國曼徹斯特市，有幾個在英港人組織喺當地舉行遊行集會，點知遊行完之後，其中一個搞手組織「曼徹斯特真香港人協會」（「協會」）就發聲明，圖文並荗咁譴責有人喺集會之後，喺街頭到處放火同破壞公物，不滿令英國人對港人產生壞印象。囍雨想講，原來佢哋都知道縱火同破壞喺唔啱？點解當日有暴徒喺香港街頭縱火，又唔見有反對派發聲譴責？呢種雙重標準，真係嘆為觀止！

有人想包庇惡行 大事化小？

不過又咁講，「協會」發完譴責聲明之後，又有另一搞手組織出嚟反駁，話遊行入面只係焚燒過5面中國國旗，當時有知會現場嘅英國警員，成日行動都無公物被毀壞，仲話希望香港人能夠減少批判。囍雨覺得，佢哋意思啫係想講，協會作故仔刻意誣衊？如果係咁，協會所發布嘅影片又點解釋？「協會」都係「反中亂港」嘅同路人，有咩理由要講大話先？最有可能嘅，件事本身真係有發生，有示威者縱火破壞，「協會」睇唔過眼就發文譴責；另一邊廂，又有組織想包庇涉事者、大事化小，所以先至諗藉口狡辯。

對暴力的雙重標準

或者再退一步講，不論破壞事件係真定假。喺呢件事上面，囍雨見到另一個問題，「協會」發譴責聲明，目的顯而易見，就係想同暴力割席，想第一時間置身事外。又咁講，當日香港反修例暴亂高峰期，更嚴重嘅街頭暴力同縱火場面幾乎每日上演，點解佢哋又不以為然？當發生喺英國，就要出聲譴責？係咪怕件事鬧大咗，令到英國當局同民眾不滿，作為遊行搞手嘅要負上刑責，甚至會影響到自己嘅居留權，甚或移民機會，所以先咁大反應？要立即割席反面？

原來大禍臨頭，「反中亂港」分子都係各自飛，而且飛到英國著草都唔夠，有事就立即同「自己友」割席，真係夠晒「義氣」。仲有，到依家囍雨都見唔到，一眾話要打國際線嘅「走佬政客」，有就事件有明確表態過，就連身處英國嘅攬炒頭目羅冠聰，都只係發帖文，唔敢開宗名義批評，只係話咩「要理解雙方差異，放下個人得失」，講呢啲空泛無物嘅說話。唔知依家喺香港坐緊監嘅「手足」，睇到件事有咩感覺呢？當日信錯咗嗰啲「齊上齊落」嘅大話，搞到依家自己一身蟻，會唔會覺得好後悔？

原圖：「曼徹斯特真香港人協會」社交網頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk