自從職工盟上月宣布啟動解散程序之後，等咗半個月終於有進展。日前職工盟召開特別會員大會表決，以大比數通過解散議案；換言之，職工盟呢個成立咗31年，一直用社團註冊嘅「非工會組織」，終於正式走入歷史。雖然組織已經解散，但係職工盟仲有好多事交代得唔清唔楚，就好似到底因為咩實質理由同事例，令到佢哋要解散？仲有，組織解散之後嘅資金處理問題，大家都有唔少疑問。職工盟有責任同公眾同市民交代，唔能夠不了了之。

解散理據依舊含糊不清

職工盟要解散當然無問題，但佢作為反對派嘅「老牌組織」，在情在理都應該同大家講清楚點解要解散。依家職工盟嘅講法含含糊糊，佢哋大約嘅意思，係想講自己係不敵「政治壓力」，所以先要解散。問題嚟喇，有記者即場追問，想知道職工盟成員實際上遇到邊種「壓力」，到底係點嚟？但係職工盟始終都畀唔到咩實際證據同例子，全部都係空口講白話，好似自己都搞唔清發生緊咩事，只係強調「無做過違法事」。囍雨就覺得，既然佢哋覺得無做過違法嘢，扮到咁「理直氣壯」，點解又要解散？

仲有喎，雖然職工盟之前有提過，係基於有成員收到訊息，指繼續運作會有「人身安全威脅」，所以考慮過風險代價，決定啟動解散程序。但到底所謂嘅「訊息」內容係點講？由邊個發出？如果係受到威脅，又有無報警求助？依家乜詳情都無，真係佢哋講晒啦。到底真係有人身安全風險，定有其他理由，佢哋自己心照啦！

資產問題須交代清楚

職工盟雖然已經走到盡頭，但唔等於一了百了，仲有好多後續問題要處理。就好似組織資金問題咁，職工盟自己話仲有約2千萬元資產，將來扣除必要開支，餘款會攤分比所有屬會。然而問題在於，因為組織係用社團註冊，所以位於油麻地永旺行嘅物業，係由另一間有限公司持有。囍雨同大家都想知，到底所謂嘅2千萬元資產，係咪已經計埋嗰間公司嘅資產？會唔會仲有隱藏資產仲未公開？為釋除大眾疑慮，職工盟應該盡快公開埋間有限公司嘅帳目。

職工盟屬會要考慮將來路向

講起錢，其實職工盟之前收咗唔少來自外國團體嘅資金，如果組織解散「要分錢」比屬會。啲屬會真係要諗清楚，如果佢哋接受筆錢，變相係間接收外國團體資金，雖然囍雨唔肯定咁樣係咪有問題，或者會唔會有違法風險，但係瓜田李下，係唔係要收呢筆錢，風險要佢哋自己衡量喇。與此同時，嗰啲屬會應該趁呢個機會，好好反思吓，將來要點行落去。

職工盟有部分屬會只係掛名性質，本身自己無會址；而囍雨都見到，有屬會已經出嚟講，話無咗職工盟嘅永久會址，對組織運作有影響。但事實上，囍雨又覺得呢啲都唔係咩大問題，對於會址問題，只要聯合幾個屬會一齊租個辦公室，請少量職員處理會務就得，並唔係咩大開支、亦唔係咩難事。事在人為，就算無咗職工盟都好，屬會一樣可以照常獨立運作，只要大家係做正常工會做的事，其實一定有生存空間囉。

講到底，職工盟解散係自己選擇嘅，唔好再將責任推落其他人身上，扮到成個「受害者」咁樣。就算職工盟堅稱「無違法」都好，希望佢哋謹記一點，解釋組織或有成員辭職，一樣唔能夠抹走刑責，唔能夠「保平安」。如果曾經違法，或者觸犯《港區國安法》，執法部門一樣會追究到底，絕對唔會有例外。

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk