有單有趣嘅新聞，想同大家分享吓。據講，香港賽馬會原來喺今個月初，已經終止咗壹傳媒老闆黎智英、民主黨創黨主席李柱銘同民主黨前主席何俊仁等14人嘅會籍，馬會雖然無透露點解要咁做，但係就有傳媒報道話，馬會其實係考慮到聲譽問題，如果有會員被法庭裁決罪成，按慣例都會取消會籍。囍雨諗，就連馬會都識主動出擊，將犯法同不名譽嘅會員踢出會，點解社會上部分專業團體，反而對組織入面存在「罪犯會員」，好似無動於衷咁嘅？

黎智英本身無專業資格就先撇開唔講，但係身為資深大律師嘅李柱銘，同埋事務律師何俊仁，佢哋分別所屬嘅大律師公會同香港律師會，其實係咪都應該倣效做法，將佢哋踩出會，或者至少「釘牌」先啱？點解好似去到今日，都唔見兩會有相應行動咁嘅？如果犯咗法都唔洗踢出會或處分，咁要做到幾咁過分，先會考慮停牌，甚至係DQ？

反對派大律師屢被「放生」？ 

先講大律師公會，本身已經成日被人質疑係高度政治化，甚至被指「特別關顧」

某特定政治背景嘅人。對於呢啲批評係咪準確，囍雨都唔敢下定論，但係有啲事例擺咗喺面前，令公眾有啲咁嘅負面觀感、有懷疑。好似李柱銘，前年8月18日維園非法集結案罪成，被判囚11個月、緩刑兩年；同案嘅反對派大律師吳靄儀，亦罪成判監12個月、同樣緩刑兩年，兩名大狀都留有「案底」，點解咁都未「釘牌」？仲有喎，已經宣布退出政壇嘅公民黨前立法會議員陳淑莊，年前因為「佔中九人案」罪成判囚8個月、緩刑兩年，但亦唔見佢有被「釘牌」。雖然有報道話，大律師公會有對李柱銘等人展開調查，但公會方面從未證實囉！ 

至於另一「主角」何俊仁，因參與前年8.18、10.1及10.20非法集結案，多案總刑期已經有成18個月，而佢前日又因為舊年6.4非法集結案，再被判囚10個月。何俊仁有咁多單案件被判罪成，仲已經坐緊監，身為律師知法犯法，證據確鑿無得抵賴，呢種情況下都唔需要被「釘牌」？香港律師會係咪應該考慮盡快做嘢呢？

社工註冊局最壞的示範

不過講開又講，如果提到專業團體或機構，疑似「放生」嘅事件，又點可以唔提社工註冊局呢？立法會前議員、註冊社工邵家臻，前年因為「佔中九人案」罪成，被判囚8個月。點解邵家臻犯法、坐完監，註冊局仲會批准佢續社工牌？一個有案底嘅人，仲有資格做社工？註冊局嘅做法，絕對係做出最壞示範，把關機制如同虛設，社工們又點會知道守法守規嘅重要性？如果係基於法例所限唔可以做到處分嘅，咁唔該勞工及福利局就盡快修例，解決呢個制度漏洞啦！ 

囍雨明白，凡事都有規有矩，專業團體處理會員紀錄問題，可能會有自己嘅一套處理機制、審核標準，但都要顧及民意。就好似李柱銘同何俊仁咁，既然都已經罪成，法庭已經有晒裁決，佢兩個亦唔見有上訴，咁就可以盡快處理啦。繼續拖拖拉拉，無論對團體嘅聲譽同公信力，甚至係整個專業嘅形象都係百害而無一利。點做先啱？睇睇馬會點做咪知囉。

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk