《港區國安法》頒布後，港府開始喺各政策方面加入維護國家安全嘅元素，今次終於輪到財經事務及庫務局公布喇！局方尋日公布，即日起修訂慈善機構豁免繳稅嘅稅務指南，列明任何團體「支持不利國家安全活動」將會被撤消免稅資格。政府嘅連串舉動，再次印證，中央安排由「武官」出身李家超擔任政務司司長，目的就係要統籌各部門去檢討同跟進各自嘅工作範圍，檢查維護國安方面有冇缺失。
稅務局僅釐清既有做法
講返修改稅務指南件事，執業會計師林智遠今朝就喺電台節目解釋，其實若然有團體從事政治活動，本身亦一向唔會被視為慈善團體，今次財經事務及庫務局只係釐清既有做法。大家要明白，慈善團體本身嘅工作，應該係救助貧苦等，做實事去幫助社會大眾，所以先會有免稅資格嘅優待；如果有「慈善機構」做埋啲踩界嘢，甚至不務正業去搞政治，甚至有危害國安全嘅風險，即係話已經「變晒質」，當然唔能夠再有稅務優惠啦！囍雨相信，今次稅務局嘅做法，一方面提醒慈善團體要守法守規，同時亦係一種警告，如果有機構硬係要挑戰底線，就唔好怪當局唔客氣。
財經事務及庫務局今次嘅做法，正正反映到港府嘅取態有變。以往《國安法》實施之前，政府部門嘅政策或者監管方面都完全冇國安嘅意識同考慮，依家既然《國安法》已經實施，所有事當然都要「執返正」。況且，只有《國安法》嘅法律保障，其實真係唔足夠，一定仲要有制度上嘅配合先得，而稅務局今次嘅舉動，就係其中嘅一步。
政府部門連環出手 撥亂反正
大家都會見到，政府部門近期圍繞國安範疇嘅動作頻頻，例如教育局，喺推動國家安全教育，除咗有課程框架畀學校參考，仲為教師開設工作坊講解，確保國安教育可以順利推展；據報勞福局又計劃修改《社會工作者註冊條例》及《職工會條例》，禁止《國安法》被定罪者擔任社工，以及不得出任工會理事；商經局又建議修訂《電影檢查條例》，賦權政務司司長拒絕畀「不利於國家安全」嘅影片上映。仲有仲有，之前康文署都喺轄下嘅公共圖書館，將部分涉國安案疑犯嘅著作，以及將內容可能違反《國安法》等嘅書本下架。
過去政府喺國安考量方面有缺失，其實真係唔緊要，畢竟都已經過咗去，最重要嘅，係依家肯主動檢視有咩過失，盡快去填補漏洞。囍雨都見到，政府喺呢方面都好努力去做。不過，維護國家安全，其實絕對唔止係政府嘅責任，市民大眾都要出一分力。政府要從檢視現有嘅政策同制度，係咪存在可以比反中亂港分子鑽空子嘅地方，如果有嘅話，當然要盡快修例同改革。至於民間都要打醒十二分精神，如果見到有制度漏洞，一定主動向政府提出；見到有涉嫌違反《國安法》行為，一定要向執法部門舉報。只有政府同市民上下一心，維護國家安全嘅工作先可以全面落實，確保唔會再出現2019年暴亂四起嘅局面！
原圖：中通社
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論