英國早一排為咗「CAP水」，推出所謂嘅BNO 「5+1」移民簽證計劃。最近有報道話，英國打算修例，要求申請人（非BNO持有人）同BNO持有人，必須證明「有意同住英國」。即係話，申請人一家人都要「留英同住」，父母或其中一方，唔可以長期做「太空人」，一邊留港工作搵錢，再等到一段時間之後先去英國團聚。先唔好講英國嘅BNO移民計劃本身係違反《中英聯合聲明》先，英國今次嘅安排，其實又合情合理喎，班拎住BNO移英嘅人剩係識搵著數去兩家茶禮，呢個世界邊有咁便宜呀？

修例阻止「食兩家茶禮」

老實講，個所謂嘅BNO移民計劃，本身條文就擺明唔合理，留英滿6年先有機會申請入籍，仲要係唔保證一定成功，最終隨時「得個桔」。雖則係咁，囍雨係真心支持英國今次嘅新安排，直頭覺得係真係合情合理添呀。大佬，又想移民英國，又想走「灰色地帶」，留喺香港「搵真銀」？點講都講唔通啦，英國想施加限制，囍雨當然係舉腳贊成！

限制雙重效忠乃國際慣例

再者，申請咗移居英國，其實都係疊埋心水諗住喺外國生活啦，英國今次安排，其實對呢班咁想離開香港嘅人係冇影響囉；移得民去英國，不如永遠留喺當地，兼取主動放棄香港身份證，唔好再做香港居民，咁先夠徹底嘛，留返香港居民身份做咩？想有事返香港拎福利呀？唔好咁「低莊」啦。查實，想移民就係要有取捨啦，放棄香港事業喺外國從頭嚟過，基本上係定律嚟，所以囍雨先會三番四次，叫人移民之前真係諗清楚，呢個唔係絕對一個簡單嘅決定。

英國打算修例，解決「食兩家茶禮」嘅問題，比香港行先一步，囍雨希望港府都唔好再拖，要盡快出手處理。例如可以考慮推出劃線方案，規定某個期限之後，正在申請或成功入籍外國嘅港人，將會被取消「永久性居民」身份同相關權利等。上述嘅方案只係拋磚引玉嘅例子，實際上要用咩方案處理、點樣執行，社會可以繼續商討，但唔夠再無了期拖落去。仲有，囍雨想再勸吓想移民英國嘅人，若然覺得香港唔適合自己，唔該唔好勉強自己，疊埋心水去做返個英國人，咁先叫做有少少骨氣，而唔會畀英國人睇死囉，朋友。

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk