社工嘅職責係用自己嘅專業知識，幫助有需要人士解決困難，甚至提供心理同情緒上嘅支援。但如果社工本身其身不正、「有問題」，試問又點樣可以幫到其他人？最近有傳媒引述消息指，勞福局計劃修改《社會工作者註冊條例》，任何觸犯《港區國安法》並定罪嘅社工，除非得到社工註冊局全體成員同意，否則就唔可以做社工，亦即係會被「釘牌」，而相關修例工作最快今年展開。囍雨想講，修例當然值得支持，亦希望當局可能盡快落實，但係《社工註冊條例》仲有其他漏洞，係咪都應該考慮一併處理？

既然「有前料」 必須小心提防

講返修例本身，其實真係無可厚非。大家要明白，如果有社工有觸犯《國安法》被定罪，犯咗咁嚴重嘅罪行，單係妄顧法紀呢一點，就明顯有違專業道德，仲有咩資格做社工？更何況，社工嘅工作性質，需要經常要接觸大眾，對像由兒童到老人家都有；一旦有害群之馬，用社工嘅專業身份，以「幫人」為名，乘虛而入，借機散播分裂國家等極端思想，咁樣點算好？《國安法》定罪者既然「有前科」，就更應該小心提防，唔畀佢哋做社工，無疑係最穩陣嘅做法。

罪成曾判囚 仍可做社工？

仲有仲有，今次事件衍生出一個問題，依家《社工註冊條例》中，其實有列明一系列「指明罪行」，任何人觸犯相關罪行及被定罪，都唔能夠擔任社工。但係條例所涵蓋嘅，大部分係性罪行，其餘仲有拐帶兒童同謀殺等，覆蓋範圍明顯不足，甚至已經變成漏洞。問題有幾嚴重？大家睇吓就知！

就好似區議員兼社工曾健超，喺「違法佔領」期間襲警同拒捕，其後罪成判監5星期，社工註冊處只係發書面警告了事；更離譜嘅係，立法會前議員、社工邵家臻喺「佔中九人案」，被裁兩項「煽惑罪」罪成，判監8個月，事後繼續仲可以續到「社工牌」。 睇返當局嘅統計數字，由2018年1月到今年4月，有7名社工（包括邵家臻）犯刑事罪被定罪，暫時無一個人被「釘牌」，條例係咪太過寬鬆？犯咗法被定罪，仲可以大搖大擺繼續做社工，社會又點能夠接受？

囍雨希望，當局真係會修訂《社工註冊條例》，而且除咗加入《國安法》相關罪行之外，一定要考慮加入更多其他刑事罪行，填補現時「空白」嘅地方。等社會大眾都可以放心，知道服務自己嘅社工都係「清清白白」，唔會係罪犯、甚至暴徒，係可以信任嘅！

原圖：立法會網頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk