囍雨曾經睇過一本法律學嘅書，入面提到宣誓，原來起源係來自古代宗教儀式，後來隨著社會發展，宣誓已變成具法律效力嘅儀式，違反誓言者將會受到懲罰。睇返香港情況，自從《港區國安法》實施之後，宣誓要求就更加具體化，之前絕大部分公務員已經簽咗聲明，宣誓擁護《基本法》同效忠香港特區。而且最近教育局仲話，研究緊有關教師宣誓安排嘅事宜，將會適時公布；如果最終真係落實推行，囍雨絕對係舉腳支持！其實，喺《國安法》已經實施嘅今日，實在諗唔到有咩理由教師唔使宣誓。

要求教師宣誓並非新鮮事

宣誓內容所要求嘅擁護《基本法》、效忠特區，其實係港人基本責任同義務，就算有無宣誓安排都好，本身都應該要做。宣誓不過係將要求具體同實現化，如果教師係「行得正、企得正」，唔會去做啲踩界嘢，根本無嘢好擔心。仲有喎，要求教師宣誓根本唔係新鮮事，德國同日本等地一早做緊。大家要留意，就算喺德國嘅教師誓詞入面，都提到要「忠實於聯邦德國基本法和巴州憲法，遵守法律」；日本教師誓詞都列明，「尊重並發誓牢牢擁護承認主權在民的日本憲法」。既然外國有先例，當中都有強調法治精神元素，咁香港要求教師宣誓又有咩咁出奇？

應盡快修例 訂立違誓後果

仲有仲有，大家唔好忘記，關於「擁護《基本法》、效忠特區」要求，其實已經有明確和清晰的法律定義。《釋義及通則條例》條文列明「正、負面清單」，有啲咩可以做、有啲咩唔可以做，大家一目了然。要求教師宣誓，係提醒佢哋唔好越過紅線，否則就會有後果。不過喺懲罰方面，教育局似乎依家未有提到，但囍雨希望當局一方面盡快落實宣誓要求，另一方面都要考慮修訂《教育條例》，如果將來有人違誓，好應該被終身DQ冇得再做教師！

或者會有人問，點解教師要宣誓？唔知大家有冇睇過《點．解．激進化》本書呢？當中都有講過，教育係非常易於傳播價值觀嘅媒介，如果對教學人員質素無把關，當中嘅「真空」可能會被人利用，喺學校向兒童同年輕人傳播激進思想。大家要明白，過去嘅反修例風波，有近4,000名學生、約110名教職員被捕，香港教育明顯出咗問題，日後必定要徹底檢討同改革，而要求教師宣誓就正正係踏出第一步，所以囍雨一定會支持到底！

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk