廣東話俗語有講，「有咁耐風流，就有咁耐折墮」，真係幾有哲理。就喺琴日，藝人何韻詩喺社交網頁帖文，自爆收到香港藝術中心通知，對方根據場地租借合約，指租用過程中可能危及公共秩序及公共安全，所以取消佢嘅場地預約，原訂嘅演唱會要取消；而何韻詩就話，會保留追究藝術中心嘅權利。件事經傳媒報道之後，反對派陣營反應極大，仲講到係「政治打壓」云云。囍雨想講，其實件事好簡單，場地覺得有風險，所以依規例取消預約。至於點解會有「風險」？何韻詩應該心知肚明，之前做過咁多踩界嘢，人哋怕咗你都好正常啫！

扮演「政客」 積極打國際線 

何韻詩除左藝人嘅身份，最為人所知嘅，仲有佢嘅反政府立場。囍雨唔講咁遠，淨係反修例暴亂期間，親自去到聯合國人權理事會，誣衊香港有「警暴」問題，要求將中國喺理事會之中除名；佢仲有同前「香港眾志」秘書長黃之鋒等嘅反對派政客，去到美國國會出席聽證會，促請對方通過《香港民主人權法案》。何韻詩嘅言行舉止，同反對派政客有咩分別？仲有喎，何韻詩係「612人道支援基金」信託人之一，依家警方正以涉嫌違反《港區國安法》嘅方向調查「612基金」，佢係咪涉案、警方調查目標之一，似乎都仲係未知。藝術中心避免有麻煩，同佢劃清界線都好合理。

風險不容忽視 取消預約合理

藝術中心作為場主，有責任評估風險，確保場地內舉辦嘅活動，喺安全同合法環境下進行。大家可以諗吓，如果場地入面搞嘅演唱會，偏離原有計劃，出現違法甚至違反《港區國安法》嘅行為，場主隨時要承擔一定責任；加上，何韻詩本身政治立場咁「惹火」，到時如果有不同政見人士喺現場發生衝突，要麻煩到警察嚟處理，咪又係盞搞！既然有咁多潛在風險因素，取消預約就係最好嘅處理方法。

唔知大家仲記唔記得，其實喺2016年，有法國化妝品品牌邀請何韻詩合辦小型音樂會，結果引起內地同香港網民猛烈抨擊，質疑點解要搵涉嫌參與「佔中」嘅何韻詩合作。最後公司要同何韻詩割席，同埋以「鑑於有可能出現之安全因素」為由取消音樂會。既然一早有前車可鑑，而且現時社會政治環境比之前更加緊張，所以藝術中心擔心有風險，想劃清界線都好正常。講開又講，如果何韻詩純粹想同大眾分享音樂，其實唔洗搞實體現場會，網上直播都一樣得。

對於有人質疑藝術中心，今次嘅做法係刻意「打壓」，咁囍雨就想問，點解藝術中心要針對何韻詩先？如果話係源於佢嘅「黃絲」藝人身份，咁點解其他「深黃」藝人又無畀人割席，甚至有人啱啱先搞完幾場舞台劇；由此可見，政治立場都唔係問題。仲有，如果依家唔叫取消場地預約，到時個活動真係出事，邊個負責先？何韻詩有今日嘅下場，應該反省下自己，到底做過啲咩，點解人哋會「買佢怕」！

原圖：星島日報、RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk