隨住「12瞞逃」李宇軒認罪，「攬炒」陰謀嘅細節愈揭愈多。今日有傳媒爆料，指拎到李宇軒向美國提供嘅「制裁名單」，當中有唔少被攬炒派視為敵人嘅建制派政界人物、警隊高層，甚至律政司檢控單位嘅高層都榜上有名，加埋足足有成144人咁多。講真，份名單真係令人好心寒，因為原來喺黎智英等人眼中，只要同佢哋政見唔同、或者睇佢哋唔順眼嘅人，都會叫美國去「制裁」。攬炒派成日大大聲話要「追求民主」，查實最獨裁嘅就係佢哋！

名單中值留意的細節

「制裁名單」中嘅政治人物同警方高層就唔講啦，事關佢哋不嬲都係攬炒派「重點招呼」對象，囍雨反而認為，名單入面有三個人名，絕對值得大家留意，包括前刑事檢控專員梁卓然、選舉管理委員會主席馮驊，同埋時任電視廣播有限公司助理總經理（新聞及資訊）袁志偉。點解囍雨會特登拎嚟講？因為從呢三個人選，就可以睇到攬炒派有幾咁野蠻、荒謬。

先講前刑事檢控專員梁卓然，一睇就知，攬炒派肯定係覺得，佢當日參與檢控反修例涉示威者，想幫啲「手足」出返啖氣。但問題就嚟啦，梁卓然只係履行自己嘅職責，依法檢控違，咁樣都唔得？暴動喎，美國都會檢控暴動犯啦，黎智英竟然想透過「制裁」去打壓？除咗要報仇，攬炒派係咪仲諗住「殺一儆百」、制造「白色恐怖」，嚇怕其他律政人員，等佢唔敢起訴暴亂分子？

至於掌管TVB新聞部嘅袁志偉，「裁制名單」就寫到明，係因為攬炒派認為TVB立場「親中」，仲質疑TVB新聞報道手法有問題、無全面報道「警暴」事件等，所以列入名單。咁樣就真係好好笑，攬炒派成日話要保障「新聞自由」、「編輯自主」，依家完全係背道而馳。攬炒派喉舌就要保護，對佢哋認為不同意見嘅傳媒就要拚命打壓，呢種雙重標準，真係嘆為觀止。

此外，攬炒派點解要制裁馮驊，其實囍雨都係估估吓。可能佢哋係想為之前喺選舉被DQ嘅「手足」報仇？但係DQ參選人與否，其實係由選舉主任獨立做裁決，選管會主席並無賦予相關法定權力，可以話係同成件事無關，攬炒派係咪「點錯相」？點解攬炒派可以咁求其，亂咁將啲人名加落去都得？咁粗製濫造、憑感覺嘅「制裁名單」，真係得啖笑。

霸道至極 與美國如出一轍

從「制裁名單」睇到嘅，係攬炒派背後嘅獨裁專橫。唔理係檢控專員、傳媒高層，定係警員都好，完全唔使講道理；就算自己有錯都好，只係指摘點出問題、執法嘅人有錯，唯我獨尊、當正自己啱晒。甚至當聽到啲說話唔啱聽，就話要「制裁」人哋，一言堂到呢個地步，連多元聲音都容納唔到，仲好意思話想「爭取民主」？攬炒派嘅做法態度，簡直同美國一樣係咁霸道，完全活喺自己嘅世界入面。

原圖：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk