自從「12瞞逃」之一嘅李宇軒，同埋律師助理陳梓華，就「串謀勾結外國或者境外勢力危害國家安全罪」認罪後，當日「攬炒」陰謀嘅黑幕亦終於一層一層咁被剝開；庭上證供證明，壹傳媒老闆黎智英同佢助手Mark Simon，其實就係成件事嘅幕後主腦之一！呢單咁嚴重嘅案件，本應值得全香港媒體連日大篇幅咁報道，但係囍雨發現一個怪現象，就係大部分親反對派嘅媒體都「冷處理」呢單案，甚至直頭唔報道，你哋話奇唔奇？點解會咁嘅呢？

低調處理 集體「失聲」

點解囍雨認為「攬炒」陰謀極之值得報道？簡單咁講，如果唔係有「攬炒」、唔係有人公然叫外國勢力制裁內地同香港，中央都未必會立《港區國安法》啦，咁講，相信都冇乜人會反對。呢個道理，所有做媒體嘅人理應都會明白，事實係如果換著係以前，呢啲咁搶手嘅話題，傳媒梗係第一時間去報道，甚至仲會有後續分析同跟進調查，畀讀者知道事態嘅最發展。

之但係今次係完全唔同，親反對派媒體直頭係集體「失聲」，就連某商營電台嘅「烽煙」節目，都以「案件未結束」為由，避談呢單案。李宇軒認晒罪啦，所有內容都係庭上公布，有咩唔講得呀？唔好玩啦。總之呢，一眾反對派喉舌畀人嘅感覺，就係佢哋之間好似有晒默契，想一齊聯手低調處理咁。明明當日喺反對派自己，大大聲質問勾結外國勢力嘅證據喺邊？依家真係證據確鑿啦，點解又咁低調先？

黎智英「餘威」仍在？

見到而家個情況，囍雨諗起舊年，黎智英被指捲入干預美國大選，涉做假報告，抹黑美國總統拜登同佢兒子嘅醜聞。當時嘅情況同依家一模一樣，當日黎智英助手Mark Simon認咗參與其中，事後仲所謂「引咎辭職」。香港傳媒大亨「心腹」干預美國大選喎，點睇都係大新聞啦，但大家睇返當日部分反對派傳媒嘅報道，明顯同件事不成比例，情況就如今日同處理李宇軒案如出一轍，到底只係編採方針「咁啱相同」，定係黎智英嘅「餘威」仍然存在，只要同佢有關嘅負面新聞、消息，都一律要當睇唔到？甚至係仍然有隱形大台在背後操控輿論呢？

某啲反對派媒體，成日將新聞自由、追求民主掛喺嘴邊，少少編輯改動就搞擺工、搞請願，但撫心自問，佢哋自己做緊咩？佢哋到底係咪有「自我審查」，刻意隱藏、淡化一啲事件，有無誤導、愚弄讀者，就留畀眼睛雪亮嘅大家自己判斷喇。囍雨反而擔心，如果真係仲有無形大台的話，香港人會繼續畀人愚弄到幾時呢？

原圖：中新社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk