話說，尋日「12瞞徒」李宇軒同律師助理陳梓華，喺法庭承認「串謀勾結外國或者境外勢力危害國家安全罪」，仲全部承認控方喺庭上披露嘅案情。原來，壹傳媒老闆黎智英同佢助手Mark Simon係「攬炒」嘅幕後主腦同金主，而陳梓華就係聯絡人，負責指揮李宇軒同外號「攬炒巴」嘅逃犯劉祖廸，由佢兩個去搞眾籌同國際宣傳，游說外國制裁中國同港府。依家兩個被告都認晒罪，成件事亦水落石出，但係一早已經潛逃英國嘅劉祖廸，尋晚竟然仲好意思喺社交網站發帖死拗，認真厚面皮囉。

劉祖廸原文如下：

回應李宇軒、陳梓華案：

1/ 由此至終，國際線都係自發。如果黎智英喺幕後操縱，就唔需要眾籌，更唔需要自己一手一腳由零開始接觸外國議員。

2/ 個人尊重佢地決定。

3/ 拉我兄弟，唔代表會完。我會加倍奉還。

避重就輕 無視案情

對於劉祖廸嘅回應，簡而言之就係避重就輕。首先，劉祖廸話國際線係「自發」，又話若然係黎智英喺幕後操縱，就唔需要眾籌；但根據案情，黎智英係先「墊支」俾佢哋喺海外登報，而李宇軒等人喺成功眾籌之後，係要還錢俾黎智英嘅。即係話，由黎智英出資包底，就算眾籌唔達標，計劃都會照去。你啲攬炒支持者見到，咪以為你哋真係搞得成、做到嘢，自然吸引到更多人肯「課金」，長做長做囉！簡單而言，即係有眾籌亦唔等如冇黎智英操縱，兩件事根本無因果關係。

另外，劉祖廸聲稱自己一手一腳接觸外國議員，大佬呀，有咩正常人會信呀？一個喺反修例暴動前後都係寂寂無名嘅人，外國政客真係會理佢？黎智英就唔同喇，一早已獲西方國家「重視」，前年赴美嗰陣，就連時任副總統彭斯同時任國務卿蓬佩奧都要親自接見；而且黎智英嘅助手Mark Simon，本身就係美國共和黨成員，更曾經做過共和黨香港支部主席，美國嘅人脈夠晒廣，仲不時幫黎智英穿針引線見外國政客。黎智英兩主僕背景夠晒雄厚，由佢哋去聯繫外國政客，點都可信過劉祖廸你啦，拜託！ 

不過講開又講，劉祖廸好似同啲「手足」關係麻麻囉，之前仲公開宣布同自己班「攬炒團隊」分家。劉祖廸一開始話係因為路線分歧而分開，但之後再爆料，話自己同團隊，對於點樣處理1,600萬眾籌款項有唔同意見，講到尾原來又係錢！之前為咗逃避刑責，一早就走佬著草過外國，今日仲想否認罪責？呢啲人講嘅嘢，仲點信得過先？「攬炒巴」如果咁多意見，倒不如返香港講清講楚，承擔刑責，咁先係負責任做法喎！

原圖：「攬炒巴」社交網站專頁、RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk