教協早前宣布解散，一個有48年歷史嘅教師工會好快就會走入歷史。咁大個工會，宣布解散，理應有好多事務要處理，偏偏教協一眾理事就選擇龜縮唔講，遲遲都唔肯交代計劃中嘅解散程序係乜，亦冇人交代嗰四億元資產最終點分配，搞到神神秘秘咁，認真令人費解。講真，教協突然宣布解散，無非係班理事想「散水」保平安，但做過嘅衰嘢又點可能一筆勾銷？好似尋日咁，教協偷偷關閉咗Facebook專頁成日，深夜先「復活」返，但係就刪走晒啲涉反國教、參與民陣遊行、撐涉違法被捕教師嘅帖文等。囍雨想講，教協唔係咁天真，以為刪帖文就可以當咩事都無發生過啊？

想抹走「罪證」？

網上世界嘅嘢，唔係話你刪咗帖文，人哋依家呢一刻見唔到，就可以扮無事。教協做嘢咁出位、咁惹火，一路都好多人密切「關注」住，佢地出咗街嘅貼文，相信都有唔少人有備份。如果想靠刪社交網站帖文，以逃避法律責任，咁樣只係自欺欺人，晒氣啦！教協根本一路只諗點樣自保，由一開頭話要改革組織、去政治化，再到依家宣布解散之後嘅一舉一動，教協驚成咁，係咪心虛？不過，講開又講，教協咁心急刪帖文，會唔會當中係有涉嫌違法嘅內容？警方係咪應該考慮跟進調查吓？

教協必須交代解散方案

教協與其搞咁多小動作，不如正正經經，處理咗解散嘅嘢先啦！依家口講解散，但又唔交代清楚實際上點做。就好似大家都想知，教協會章寫明，要有3分2會員投票同意，先至可以解散，到底點先可以通過呢個近乎無可能嘅門檻？係輿論壓力之下，教協都只係肯向特定傳媒解釋，話透過修改會章解決。但係問題又嚟啦，到底條文要點樣修改？幾時修改？係咪想完全繞過會員同意授權呢部分？呢啲都好似無同公眾交代過！

囍雨覺得，教協既然決定解散，最後嘅一程路，不如灑脫啲，做得好好睇睇，向公眾講清楚，實際上嘅解散方法、手頭上嘅資金、物業等，後續到底會點樣處理。教協依家咁樣，俾人嘅感覺就係，只係想一路拖延，會務問題完全無諗清楚，管理層只係關心自己可以點樣「甩身」，真係做到好肉酸。其實，咁樣唔單止係愧對一眾會員，教協歷史悠久嘅「招牌」，都比你哋一次敗清光！

原圖：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk