以前有種街頭騙案手法，騙徒先利誘受害人，話要畀優惠或者獎賞佢；當受害人「上釣」，就開始一系列騙財大計，最終受害者著數就攞唔到，仲更加會破財。呢種呃人嘅手法，其實唔止喺街頭出現，近日就連台灣嘅民進黨政府都用緊。台灣早前公布，放寬對優秀嘅港澳高中生到台灣就學嘅限制，條件同外國學生睇齊。就咁聽落，好似台灣「優待」港澳青年咁，但其實只要了解當地嘅教育情況，就知道只不過係「假好心」，睇嚟似係想搵著數嘅騙局多啲！

反正招生不足 當做「順水人情」

點解囍雨會咁講？查實如果對台灣教育有啲認識，就知道當地高教界目前遇到唔少問題。一句講晒就係「台生留不住、招生不易」！由於台灣政府對當地大學嘅補貼不足，院校想上調學費又要經過重重難關，導致部分大學經費不足，教學質素愈來愈差。所以近年喺台灣嘅資優學生，都傾向去外國讀書，而海外學生對去台灣就學嘅興趣亦非常麻麻，國際招生不似預期，令台灣好多大學都收生不足。依家台灣向港澳學生埋手，根本係想吸引佢哋去填補缺口「搵真銀」，保住大學教職員飯碗，再順便「扮好人」攞「光環」，真係計到盡一盡。

就業、定居權？均無保證

就算唔講政策目的係咪「吸金」，去台灣就學本身都可能「中伏」！之前台灣當局做調查，當地大學畢業生普遍面對就業困難，就連被視為「天之驕子」嘅台大生，畢業滿五年嘅校友之中，竟然有兩成係「非就業中」，撇開進修受同服役等其他因素，都有足足6%人仲搵緊工。當台大畢業生都搞成咁，其他大學嘅畢業生，就業情況只會更差。港澳青年花錢、花時間去台灣讀書，搵到工嘅機會可能唔大，若想返香港搵工，香港僱主可能未必會認識或認受台灣學歷，大家真係要自己衡量吓，係咪真係仲要過去讀書喇。

仲有喎，今次台灣當局就醒目，講明就學期間可以申請在台居留，但係能唔能夠申請定居，要按相關法規處理。換言之，大學收生就「特事特辦」，講到定居權就要「依法辦事」，係咪真心想優待港澳青年，定係純粹為吸金、吸人才，大家心照啦！

講真，過去台灣當局對港人「口惠而實不至」嘅事例，真係多到數唔晒。就好似台灣地區領導人蔡英文，之前成日話「與港人並肩同行」，至今除咗「吹水」外仲做過啲咩實事？唔好講話民進黨政府，就連台灣人對港人嘅觀感都好似幾一般；早前美國《外交政策》雜誌研究發現，雖然有約60%受訪台灣人支持香港反修例運動，但講到係咪要提供實際援助，就只得29%人話台灣有義務幫助港人。一句講晒，不論台灣官民都好，口講幫香港就無所謂；當講到實際層面，會影響到自己利益就咪制。部分香港反對派仲妄想台灣會「伸出援手」，其實係咪天真咗啲？

圖片來源：中央社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk