嘩，精彩呀，白鴿黨嘅內部矛盾真係日日新鮮、日日甘。繼副主席李永達被揭發拋棄黨友獨自潛水英國，遭同黨中委蘇逸恒喺社交平台質疑「叫人衝，自己鬆」後，白鴿黨嘅國安疑犯尹兆堅，尋日亦透過社交網站暗撐李永達，不點名批評蘇逸恒同另一副主席梁翊婷，話呢兩名新生代係「機會主義者」、立場前後反覆，梁翊婷仲被批近半年來冇為黨分憂添。白鴿黨內鬥本來就唔係新奇事，只不過見啲國安疑犯滿口歪理，囍雨作為正常人，實在忍唔住要講返啲公道話。

又係同選舉有關

據講，白鴿黨今次內亂係源於黨內對參唔參加今年年底立法會選舉有分歧，李永達、胡志偉、尹兆堅等舊電池認為應該「企硬唔好選」，至於一班等上位嘅新生代，即係梁翊婷、蘇逸恒等就認為「梗係要選啦，唔選冇出路」。呢場路線之爭，其實已經傳咗好耐，只不過尋日由尹兆堅率先發爛，先至令事件白熱化同爆到周街都知啫。

先旨聲明，對於白鴿黨選唔選，囍雨一啲興趣都冇，大家亦唔好誤會今次撰文係想支持任何一方。囍雨質疑嘅係，尹兆堅打晒開口牌撐李永達，OK，咁唔該尹兆堅解釋，點解李永達粒聲唔出走咗去先？呢頭叫人留守地區，嗰頭靜靜雞潛去英國，一聲交代都冇，尹兆堅真係覺得李永達做得好啱好正確？

副主席走佬不用交代？

李永達唔係普通黨員，佢係白鴿黨嘅副主席呀，當選僅僅兩個月左右咋，佢真係要著草嘅，唔該都交代好「後事」先吖！據講，白鴿黨有一個叫做「地區發展資助計劃」嘅物體，負責支援地區工作嘅黨員，呢個計劃獲得李永達大力支持，潛水之前仲事事親力親為添。而家李永達一走了知，佢支持嘅「地區發展資助計劃」同其他佢分管嘅黨務點算呀？唔使理呀？

講完務實，不如講吓理念吖。李永達係黨員透過民主程序選出嚟，套用白鴿黨呢類攬炒派嘅一貫講法，李永達唔係有責任對整個黨負責咩？聲都唔聲，要畀傳媒踢爆先死死地氣透過老婆陳樹英承認走人，李永達咁都叫做對個黨負責？梁翊婷、蘇逸恒表達一下不滿啫，就要畀尹兆堅呢個國安疑犯公開批鬥？你都好無理喎。

退出白鴿黨是好選舉

老實講，「分裂」兩個字對白鴿黨嚟講一啲都唔陌生，咁多年以來，劉千石、陳偉業、鄭家富、范國威、狄志遠、黃成智等等數之不盡嘅政客，都先後做過白鴿黨嘅黨員，眾人退黨原因不一而足，不過好多時亦都同參選問題有關。至於今次梁翊婷、蘇逸恒新生代，某程度上都係因為選舉問題而同白鴿黨「大佬」嘈交，佢哋會唔會因為李永達事件而退黨，囍雨當然唔會知，只不過白鴿黨又惡又無理，其實退出都冇乜損失吖，大家話係唔係呀？

圖片來源：文匯報、RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk