在剛去嘅星期六，正當全城仍然沉醉於國家隊同中國香港運動員喺東奧嘅優異表現之際，有一個公眾人物，原來已經靜靜咁去咗英國，相信大家都知道囍雨係講緊民主黨副主席李永達。李永達呢個人好特別，除咗係反對派第一大黨民主黨（白鴿黨）嘅元老外，佢更加同反對派第一大金主、國安疑犯黎智英過從甚密，甚至可以用「心腹」嚟形容。據講，白鴿黨上下事前確實唔知李永達會突然走佬，全黨都為之吃驚。查實計囍雨話，大家又使乜吃驚吖，大難臨頭各自飛向來都係白鴿黨嘅特性囉！

李永達走咁快 一定有古怪

李永達今次粒聲唔出走佬英國，最震驚肯定佢班仍然留守香港嘅黨友，皆因佢早排先至呼籲黨友留守地區，點知轉頭一個「屈尾十」就閃咗去，班黨友唔震驚就假喇。如果囍雨係白鴿黨黨員，呢一刻一定會諗，到底李永達係唔係收到乜嘢風，所以要急急腳走呢？囍雨唔係無的放矢喎，喂，咁你李永達真係同頭號國安疑犯黎智英好熟嘛，黎智英每次喺何文田大宅搞泛民飯局，李永達好多時都係受邀嘅一個，以佢同黎智英嘅交情，或者真係收到外國某啲特殊部門嘅消息呢？嗱，講明先，囍雨只係根據客觀事實，去做主觀判斷，並唔係有證據喺手。

依家呢，全城都等緊李永達伸返個頭出嚟交代，佢老婆陳樹英雖然人仲喺香港，但就講明唔會代答，囍雨希望李永達唔會係安排老婆留低賣樓，搞掂其他手尾之後就隨即飛去英國啦。大家知啦，若然真係咁，咁即係出賣晒全黨，行為好卑劣喎？希望李永達夫婦唔會係咁嘅人啦！

民主黨人出賣黨友非首次

講到尾，李永達突然走佬呢件事，再次凸顯民主黨呢班所謂元老係幾咁可悲同可惡，唔夠兩個月前之嘛，李永達當時高調宣稱，自己係受同黨嘅一眾國安疑犯，包括胡志偉、尹兆堅、林卓廷力邀，先至肯重出江湖穩住白鴿黨軍心，令該黨唔好喺政治大風大浪下自己沖散咗。點知眨眨眼，佢自己就不理個黨死活率先走人，呢種人仲唔係背信棄義、過河拆橋？

不過講真，白鴿黨一向都有出賣自己人嘅傳統，好似發生喺2006年嘅「真兄弟」事件啦，當日事件曝光，已經印證民主黨內部勾心鬥角、權力鬥爭不斷。如果嫌呢件事太遠，不如又講講另一個早已潛逃英國嘅許智峯？許智峯係喺外國議員設局下，一家成功潛逃海外，話冇人幫佢事先安排好晒就梗係冇人信啦。但大家唔好忘記喎，許智峯有一個同佢出生入死、多次一齊出現暴動現場嘅助理陳渭新，許智峯走佬，有冇幫過陳渭新呀？睇嚟梗係冇啦，結果咪搞到陳渭新其後亦要匆匆走佬去英國囉，幾咁狼狽呀！

講到底，好心白鴿黨上下，包括隨時係末代主席嘅羅健熙呀，唔該你哋認清現實，老一輩嘅白鴿十居其九最緊要都係顧住自己先，你睇你哋個創黨主席李柱銘，自從因為前年「8.18未經批准集結案」被判罪成兼留案底後，有冇走出嚟支持過你哋？事實擺在眼前，老鴿信唔過、嫩鴿玩激冇生存空間，留喺度嘅白鴿其實仲有得揀，問題要行條乜嘢路，唔該諗清諗楚先囉。仲想搞對抗？唔該用吓腦啦。

圖片來源：星島日報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk