港府近年施政真係舉步為艱，唔止反對派陣營會雞蛋挑骨頭，就連外國都不斷想插手香港事務，實行「內外夾攻」。近日，「五眼聯盟」之一嘅加拿大又玩嘢，話因為香港新修訂嘅《2020年入境（修訂）條例》實施》，聲稱條文有唔清晰嘅地方，質疑香港會限制個別人士離境，所以更新對香港嘅旅遊警示。點解話加拿大玩嘢？好簡單，皆因香港政府一早派員同加方詳細解釋同澄清過，亦一早發過新聞稿解釋修例內容，加拿大唔係誤解，今次咁做肯定存心借題發揮抹黑香港！

跟隨國際標準 並無不妥

今次修訂嘅入境條例，有兩項條文特別「備受關注」。第一係賦權港府要求航空公司，喺航班抵港前向入境處通報乘客資料；另外，係授權入境處可要求航空公司，禁止運載個別乘客。如果加拿大覺得前者「有問題」，咁囍雨就覺得好奇怪，因為要求通報乘客資料，其實係《國際民用航空公約》下嘅國際責任，全球有超過90個國家都行緊呢一套系統，加拿大自己都有類似措施，而佢嘅「盟友」美國、澳洲等都一樣有。點解加拿大又唔質疑美、澳嘅做法？

其次係關於「禁止運載個別乘客」方面，港府澄清咗好多次，措施只適用於入境航班，而非離港航班。將心比己，如果明知入境航班上有可疑人物，會對自己社會帶嚟風險或威脅，係咪一樣要「中門大開」、歡迎入境先？肯定唔會啦。咁簡單嘅道理，加拿大點會唔知？擺明就係搞事啦。

本地反中亂港分子亦要提防

不過講開又講，加拿大要搞香港、搞中國，都叫做「明刀明槍」。反觀香港反對派陣營嘅手法，其實仲卑劣。之前當局建議修訂《入境條例》嗰陣，網上隨即出現鋪天蓋地嘅文宣，抹黑政府想「鎖港」、將會唔畀港人離開，呼籲要移民嘅人快啲走之類。呢啲謊言當然唔會站得住腳，因為《基本法》第31條都寫明，香港居民有出入境的自由；而《基本法》係憲制性文件，就算修訂《入境條例》，條文都必須確保唔會有抵觸。反對派冇可能無知或者唔識，佢哋係同加拿大一樣，故意造謠抹黑、迷惑人心，當局絕對不能姑息。

從呢件事之中，我哋可以睇到香港正面對嘅問題，雖然社會局勢雖然已大致回復平靜，但仍然有唔少暗湧。本地反對派伺機而動，加上外國勢力對香港嘅虎視眈眈，呢種「裡應外合」，港府真係要諗方法應對。最起碼要從內部開始撥亂反正，盡快訂立專門針對假新聞、假消息嘅法律，阻止迷惑人心嘅反政府洗腦文宣繼續出現！

原圖 ：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk