囍雨近日睇到美媒《紐約時報》嘅一篇「出位」評論文章，想同大家分享吓。文章題為《不惜一切代價：奧運金牌背後的中國體育舉國體制》，淨係睇條標題，都已經估到內容又係想唱衰中國。文章質疑中國「不擇手段」奪取奧運金牌，批評中國運動員係「運動機器」、重點投放資源喺西方國家唔擅長嘅運動項目，增加奪金機會；另外，部分美媒亦被揭發「操縱」奧運獎牌榜，無視以金牌數目做排名嘅國際奧委會標準，改用獎牌「總數」作排名，藉此令美國排名可以反超前「騎住」中國。美國咁做，無疑於自欺欺人，亦都反映佢哋根本唔了解內地民情。

獎牌乃其次 突破自己才是關鍵

如果中國運動員只係被當成「奪金牌機器」，咁理論上有運動員拎銀牌或銅牌，甚或一面獎牌都拎唔到時，應該會受到內地民眾千夫所指先啱，但係實際上又見唔到喎。公道啲講，喺個別項目，若然中國運動員喺奧運惜敗，確實有啲內地網民會表現得較為激動，甚至係嚴厲批評，呢啲確實存在。但囍雨強調，呢個情況只係存在喺非常個別項目，內地整體社會主流意見同埋媒體，都係以鼓勵、支持參賽運動員為主。運動員能夠奪金，大家會為佢哋而高興，即使落敗都好，一樣會感謝運動員嘅付出同努力。內地民眾最關心嘅，係運動員有冇盡力比賽同可唔可以突破自己。

囍雨唔係吹水，類似嘅例子真係有排數。就以「亞洲飛人」蘇炳添為例，佢早前參加東奧男子一百米短跑準決賽，跑出破亞洲紀錄嘅9秒83，成為中國史上首位躋身呢樣項目決賽嘅運動員。雖然決賽只係排名第六，與獎牌無緣，但一樣獲內地民眾同媒體高度表彰，亦好鼓勵同感謝佢嘅努力。仲有，國家隊女子泳手李冰潔，喺東奧400米自由游，以破亞洲紀錄成績拎到一面銅牌，絕大部分內地網民一樣係好支持佢。內地民眾都明白，運動員們已經做出了不起嘅佳績，唔會話因為拎唔到金牌就隨便指罵，甚至係惡意批評。

港人身同感受 為所有運動員打氣

其實內地民眾嘅心情，港人都係感同身受。香港代表團出征東奧，「劍神」張家朗奪金牌、「女飛魚」何詩蓓摘兩面銀牌，大家亦替佢哋高興。而其他港隊運動員，大家都見到佢哋幾咁奮力參賽，即使最後無得到獎牌，都會為佢哋所付出嘅汗水而感動，會鼓勵運動員們唔好氣餒、撐到底！ 

至於《紐時》話中國專門喺西方國家唔擅長、無投放太多資源嘅運動項目，例如乒乓球、羽毛球同舉重等，重點培訓運動員去奪金牌。但係咁樣真係「打橫嚟講」，每個國家都會有佢嘅優勢項目，奧運比賽項目係公開嘅，美國想培養都可以照住清單去做，點解係都要眼紅中國呢？再者，某啲運動項目喺國內受歡迎，民眾參與度高，自然可以產出頂尖運動員，咁樣係好正常嘅。美媒只係針對中國，又唔見會去批評韓國雄霸射箭獎牌榜、日本喺柔道奪得大量金牌？

唉，好心美媒就應該公道啲啦，美國過去咪一樣長期喺奧運嘅游水同田徑項目拎到大量金牌（雖然近年已經走下坡）？美國喺籃球就更加係有領導地位，點解又唔見美媒會批評美國為奪金而「不擇手段」呢？真係好好笑囉！

計囍雨話，美媒為咗踩低中國而自製獎牌榜、寫埋啲無腦評論去唱衰中國，種種行為先至係對運動員最大嘅唔尊重，最「不擇手段」嘅，正正就係呢班美國媒體！囍雨深深相信，絕大部分美國運動員都冇呢啲美國媒體嘅諗法，大家都堅持奧運同體育精神，囍雨正告美國媒體，若然唔想畀世人唾棄，最好就盡快撤回呢類「報道」，做返個尊重體育精神嘅媒體啦。

原圖：《紐約時報》社交網站專頁、新華社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk