《港區國安法》首案塵埃落定，國安犯人唐英傑「煽動他人分裂國家」同「恐怖活動罪」罪成，兩罪合共判囚9年。自從案件有裁決之後，反對派網軍隨即製作大量誤導性文宣，最扭曲嘅莫過於話「插支旗都要坐9年監」。至於以攻擊中國同中國香港為基本國嘅美國同歐盟當然亦唔執輸，分別借題發揮抹黑《港區國安法》、質疑審判結果「不公正」，而德國所謂人權專員亦加把口質疑判決嚴厲，憂慮《港區國安法》被用於「打壓異已」等等。老實講，唔知案情嘅人見到呢啲說話，可能會畀佢嚇親；但知道案情嘅，就真係得啖笑！

刻意不談案件涉「恐怖活動」

囍雨首先要強調，唐英傑被判囚9年，唔係單單因為佢嘅政治立場，而係因為涉及嘅罪名同犯罪情節嚴重。事實係，無論係美國、德國人權專員定歐盟，似乎都避重就輕，刻意忽略此案極重要嘅元素 - 「恐怖襲擊」！囍雨想問問美國同歐盟，如果佢哋國家有人好似唐英傑咁，喺鬧市駕駛電單車衝向警員，最後導致多名警員受傷。同一樣嘅事發生喺外國，佢哋又係咪會「放生」行兇者？犯人需唔需要坐監？

西方國家不遺餘力打擊恐怖活動

無論美國又好、歐盟都好，一路對打擊恐怖分子、恐怖主義都絕不手軟，但係點解事件發生喺香港，就成個態度就完全唔同晒？大家可以睇吓美國，之前不惜派美軍最精銳嘅海豹突擊隊，跨境執法潛入巴基斯坦擊殺「阿爾蓋達組織」頭目拉登，大家就可知道美國係幾咁抗拒恐怖主義。事實上，國際社會早有共識，絕對唔會同恐怖分子談判或妥協。既然係咁，點解西方國家今次面對唐英傑案，成個態度就完全唔同晒？咁樣嘅雙重標準，真係令人「嘆為觀止」！

除咗對案情「講啲唔講啲」，西方國家質疑香港法庭審判結果「不公正」，呢一點都夠離譜。西方國家要對香港法庭判刑指指點點，唔該都講講道理，提出批評同質疑嘅時候，必須拎出法理依據去以法論法。最起碼講清楚，審訊到底點樣「不公正」法、邊個環節有問題？

審訊公平公正公開

睇返成單案，整場審訊係公開進行，唐英傑亦充分享有各項法律權利，包括保持緘默，以及自選法律代表等基本權利，佢一樣不少。唐英傑先後聘用過至少兩位星級大狀做代表律師，包括大律司公會前主席、資深大律師戴啟思，同埋資深大律師郭兆銘；而唐英傑亦由頭都尾都無作供，一直行使緘默權。既然係咁，真係想請問一眾西方國家，到底香港法庭點樣「不公平」？

查實話香港法庭有問題，美國到底知唔知醜？根據「世界正義工程」公布嘅《2020年法治指數》，香港整體法治水平喺128個國家同司法地區中排名第16位，高過排名21位嘅美國，當然亦高過唔少歐盟國家，美國仲好意思無理質疑香港法庭？批評又講唔出理由，美國等國家到底係咩玩法？仲唔係對《港區國安法》有偏見？

美國同歐洲長期被恐怖主義籠罩，以往亦多次受恐怖襲擊，對恐怖主義嘅危害、國家安全嘅重要性，應該好清楚先係。年前西班牙加泰羅尼亞醞釀獨立，西班牙中央政府大力打壓，時任美國總統特朗普同歐盟一樣表態支持，咁點解而家對唐英傑嘅分裂國家案又諸多偏見？點解先？

原圖：新華社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk