最近幾日網上有件事，吸引唔少網民「食花生」；全國政協副主席梁振英喺Facebook發文，關心壹傳媒前員工被欠薪，仲點名黎智英前助手Mark Simon回應。那邊廂，護主心切嘅Mark Simon就喺Twitter出Post回應；佢嘅意思大概係：黎智英已經借咗好多錢畀壹傳媒去出糧畀員工，而早前向壹傳媒收返嘅只係小部分，暗示唔可以怪黎智英拖糧。囍雨認為，員工有汗出、有糧出係天經地義，黎智英之前借好多錢畀壹傳媒都唔係欠薪嘅理由，而家重點係壹傳媒點解提前還錢比黎智英，又唔用筆錢去出糧囉，Mark Simon你明唔明呀？

所謂辭職只是「放煙幕」？

講起Mark Simon，其實大家知唔知佢乜水？上個月中，壹傳媒五名高層因涉違《國安法》被捕，相關公司資金亦被凍結；Mark Simon率先「爆料」，以黎智英「顧問」身份同路透社講，《蘋果日報》就快停運云云。事隔一個月，Mark Simon又浮上水面為壹傳媒解畫，到底佢係邊位呀？

囍雨嘅質疑並非無的放矢，大家或者已經忘記，舊年年底美國總統選舉期間，Mark Simon就被揭發科水造假新聞，「精心炮製」一份「報告」出嚟抹黑當時美國總統候選人拜登嘅仔亨特。事件曝光後，Mark Simon承認責任兼即時辭職，咁到底佢當日係辭咗啲乜？點解到今日仲涉足壹傳媒事務？呢啲問題，佢本人其實從未正式交代，黎智英當然亦冇講清楚啦。

曾效力美國情報部門 替黎智英處理「政治捐獻」

講返Mark Simon背景，根據已公開資料，佢阿爸曾為美國中情局效力35年，而佢本人亦曾喺美國海軍情報局工作，仲做過共和黨香港支部主席。2000年，Mark Simon經時任美國總統喬治布殊嘅親信介紹識到黎智英，之後兩人開始合作，一做就廿年咁耐，期間亦不時陪黎智英去外國拜見當地政客。

除此之外，Mark Simon仲有一項「秘密工作」，就係協助為黎智英捐錢畀班反對陣營嘅政客。唔係吹水，早幾年時任立法會議員梁國雄因為涉嫌冇向立法會申報收受捐款而被調查，期間爆出黎智英原來係先過錢畀Mark Simon，再透過佢開支票畀社民連、民主黨、公民黨同工黨。

Mark Simon幫國安疑犯黎智英做咁耐嘢，又成日出聲批評中央同特區政府，家陣壹傳媒欠薪，又衝出嚟護主推卸責任。佢咁多不滿、又咁關心壹傳媒，不如返嚟香港搞掂壹傳媒呢個爛攤子啦！噢Sorry，差啲唔記得，Mark Simon因涉嫌觸犯《港區國安法》，而被國安處通緝，呢種人睇怕都唔會夠膽返嚟。總之，唔理Mark Simon又好、壹傳媒都好，得把口係冇用嘅，一日唔出返啲糧比員工，講乜都只係廢話。

原圖：Mark Simon Twitter、中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk