近期香港最熱門嘅話題，相信非東京奧運莫屬。「劍神」張家朗同「飛魚」何詩蓓早前分別勇奪一金一銀，成為全城佳話；身為香港市民，大家當然支持港隊，期望香港運動員繼續衝擊獎牌。但與此同時，都有為數唔少嘅「極端反中分子」趁機搞事，大肆宣揚希望中國國家隊輸比賽、失獎牌嘅信息，甚至有人鼓動為國家隊嘅對手打氣等等，搞所謂嘅「軟對抗」。呢種做法，其實就係想將反中行為靜靜融入生活，慢慢毒害身邊嘅人。呢一種「軟對抗」嘅殺傷力，比起明刀明槍、物理上嘅暴力更加可怕，更加防不勝防！

一切都是反對派政客所害

大家應該面對現實，暴亂雖然已經消散，但人心尚未團結，反中亂港分子一直搵機會搞事。依家社會出現嘅「軟對抗」，無非係想「避重就輕」以踩界手段去繼續散播反中仇中訊息，以「走佬政客」羅冠聰同張崑陽為例，佢兩個近日反覆藉東奧大造文章。羅冠聰發帖文，附上張家朗喺攞獎牌嘅相，仲話「頒獎時熄左聲睇，會更感動」，明顯係針對中國國歌；張崑陽就發帖文，借恭賀何詩蓓攞銀牌，喺帖文底加上hashtag「鄰國得第四」，譏諷國家隊代表無緣獎牌。就係呢啲政客係到煽風點火，社會嘅「軟對抗」現象先會咁猖獗。

仲有，之前有商場搞東奧賽事直播，每當國家隊輸比賽，竟然有鼓動拍手叫好；更離譜嘅係，當之前張家朗登上頒獎台，畫面奏起國歌嗰陣，竟然有人報以噓聲，甚至舉起港英旗。事後仲有網民將相關新聞片「加工」，將原來的國歌，換成反修例代表歌曲「願榮光歸香港」。種種「軟對抗」方式，目的就係想將抗爭日常化、普及化，藉以向年輕人甚至幼童洗腦，慢慢「感染」佢哋，令佢哋參與成為當中一分子。而呢啲「軟對抗」行動，如果唔及早制止，可能會後患無窮。

加強教育、執法 兩手準備

社會上有人出現反中、反港府嘅對抗性心態，相信短時間內都幾難扭轉到。但唔等於可以袖手旁觀，首先，一定要由教育入手，仲要從低做起，喺幼稚園、小學及中學等學校入面，盡快推廣國民教育，建立國民身份認同、增加對國家認識等，由年輕人開始一步步做起。

不過，單靠教育當然解決唔晒問題，執法部門同律政司都應該適時出手，當出現涉嫌違法嘅「軟對抗」行為，就絕對唔能夠手軟，一定要依法處理。就好似之前有人喺商場噓國歌，咁嘅行為明顯有違《國歌法》，囍雨明白執法部門好難即時執法，因為隨時引起騷動，但之後都應該盡快調查，睇吓邊啲人帶頭發起噓國歌，將涉嫌違法者繩之於法。之後仲要諗諗點樣阻止同類事件再發生，例如係咪要派警員到會直播賽事嘅商場維持秩序等。

仲有，有人將改頒獎禮影片由播國歌改成播「願榮光」單嘢，先唔講可能會觸犯《國歌法》，仲有一個問題都值得關注。網上有人堅持話「願榮光歸香港」隻歌「無問題」，但係囍雨想講，之前「光時」口號，反對派咪一樣死拗話無「港獨」意思，早前法庭處理唐英傑案，最後都係裁定咗口號帶「分裂國家」意思。換句話講，將來「願榮光歸香港」會否成為「禁歌」，似乎都仲係未知數。

要處理「軟對抗」現象，就要有兩手準備，加強教育同執法工作。如果依家我哋唔立即行動，反政府、煽動仇恨思想繼續蔓延，不斷毒害年輕人。囍雨相信，暴亂終會有一日再重臨，但暴力、血腥程度將更勝從前，大家又係咪想見到呢啲事再發生？

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk