《蘋果日報》上月底正式停刊，香港立時迎來一番新氣象，不過《蘋果》班前員工就慘啲，仆心仆命為老闆黎智英賣命，因為間公司涉嫌違反《港區國安法》而突然失業，人工、墊支、津貼等福利都全部被拖欠，正宗有汗出冇糧出。不過更震撼嘅消息可能陸續有嚟，《蘋果日報》母公司壹傳媒尋日終於發公告交代財政狀況，當中最為人注目嘅係該公司原來早前已經還咗錢畀黎智英，款額仲有成1.5億港幣咁多添，《蘋果》班前員工真係羨慕到流晒口水囉。

壹傳媒向黎智英還錢1.5億

壹傳媒尋日公布，話截止5月31日，未經審核嘅銀行及現金結餘，約有3.37億港幣，較3月31日嘅約5.21億港幣，減少約1.83億元港幣，主要原因係因為集團喺四月，向肥佬黎償還1.5億港幣貸款。另外，該公司又聲稱，於6月29日收到一名獨立第三方買家洽購《台灣蘋果日報》的建議，強調管理層正與潛在買家討論，如能落實出售，集團將不再在台灣維持任何業務。

喺分析上述事件前，囍雨必須重申，絕對唔係要批評壹傳媒還錢畀黎智英，欠債還錢、天公地道，壹傳媒冇做錯呀，囍雨只係替《蘋果》班前員工唔抵咋，黎智英一次過就收足1.5億港幣還款，可憐班前員工到而家仲未收到欠薪，講緊可能每人都係幾萬蚊啫，同1.5億比真係「蚊髀同牛髀」囉。

台灣業務頻出賣 有錢會否畀前員工？

話時話，壹傳媒未來極有可能出售《台灣蘋果日報》，到時唔知壹傳媒會點樣用收返嚟筆錢呢？係會再還錢畀黎智英先，定係會拎嚟出糧畀班前員工呢？若然係出糧的話，會用咩方式出呢？用台幣出？用台灣銀行交易？定係叫班前員工去台灣收錢呢？以上種種問題，《蘋果》班前員工係咪都應該出聲等管理層解答呢！

再者，除咗出售《台灣蘋果日報》，壹傳媒早前就成功就出售台灣桃園地皮事項同買家訂立買賣協議，代價為5億元新台幣，相當於約1.39億港幣。壹傳媒收足賣地皮嘅錢未，呢個外界唔知，但如果有阻滯的話，尋日嘅集團公告理應都有交代吖。所以有理由相信，交易係順利嘅，就算壹傳媒至今未收到錢，相信離完成交易亦唔係太遠。都係嗰句，唔知壹傳媒收到錢後，會唔會用嚟出糧畀前員工？定又係會先將錢交晒畀肥佬黎，以免「肥水流向別人田」？

據講，已經有唔少《蘋果》前員工拎住欠薪紀錄向勞工處求助，將來或許會有人申請破產欠薪基金都唔定。破產欠薪基金係被欠薪僱員最後嘅辦法，囍雨奉勸壹傳媒一句，如果真係有錢喺手嘅，都係盡快出糧畀班前員工先啦，反正多案纏身嘅黎智英幾時可以出嚟都唔知，還畀前員工先，等班前員工多個錢傍身都好吖！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk