宣傳有分硬性同軟性，硬性嘅做法單刀直入，但容易令人反感；軟性宣傳就係透過潛移默化、植入式方法，令受眾喺無形間受到影響，防不勝防。警方國安處採取行動，以涉嫌「串謀發布煽動刊物」拘捕5名「香港言語治療師總工會」骨幹成員，據報案件涉及工會所出版嘅三本兒童繪本，涉將反修例運動等政治議題簡單化及美化，鼓吹使用暴力同不守法意識，以及引起對政府及司法制度嘅仇恨。兒童繪本竟然被「加料」，用嚟軟性推銷其政治主張，目標讀者仲要只係4至7歲嘅幼童。到底市面仲有幾多類似嘅「無良冷血」、「洗腦」繪本仍未被發現，一直喺到暗中毒害兒童？家長不可不防！

涉嫌美化「12瞞徒」、挑撥仇恨 

據報今次涉及嘅三本「問題繪本」，包括《羊村守衛者》、《羊村十二勇士》及《羊村清道夫》。囍雨睇完繪本，只有一個感想，似乎係有人想用童話故事做包裝，「掛羊頭賣狗肉」做政治宣傳。例如《羊村十二勇士》就係用「12瞞徒」做背景，故事描述「勇士」被「迫害」逃亡時，被狼捉到圈住，即將會「被殺」，書中最後仲問讀者，會唔會想辦法拯救「12位勇士」；另外，《羊村守衛者》，就用反修例事件時序對應故事內容，講述羊群（暗喻本地人）面對狼群（內地人）入侵，提倡羊群有攻擊能力，又用羊角去攻擊。呢啲內容咁踩界，唔單止有美化潛逃罪犯之嫌，仲疑似製造對內地人、政府嘅仇恨，莫講話兒童，連大人都根本唔適合睇！

仲有喎，工會除咗出繪本，仲出埋「親子共讀指引」，教家長閱讀繪本前後要點做、點樣向佢哋提問。更離譜嘅係，工會仲搞埋親子讀書會，講明對象係5至8歲小朋友同家長。向小朋友「洗腦」都仲未夠，原來想連大人都一併毒害埋？

被政治蒙蔽了良知 

先唔講有無違法嘅問題，呢方面警方仍然調查緊，最終一定會水落石出。問題係呢件事件本身，點解一個醫護專業人員嘅工會，會出呢種政治性「洗腦」繪本？醫者父母心，行醫者應有基本嘅專業操守、道德底線，係咪為咗政治目的，就可以將呢啲都統統拋棄？兒童好似白紙一張，思維簡單直接，隨時會對繪本內容「照單全收」，如從小就畀人灌輸呢啲錯誤嘅資訊，長大之後又會變成點？仲點會識分對與錯？

呢啲「問題繪本」嘅本身，定位根本唔係兒童讀物，而係政治文宣，用嚟煽動、荼毒讀者。反修例暴亂期間，反對派就係專門打文宣戰，喺街頭設「連儂牆」、網上發布「精美文宣」，用各種方法包裝、美化暴力，年輕人被煽動上街，數以千計人因參與違法抗爭而落得被捕、被起訴，甚至坐監嘅下場。今次「洗腦繪本」如出一轍，不過佢嘅危害性更大，因為目標受眾係無足夠判斷力嘅小朋友。如果社會唔直視問題、盡快處理，我哋嘅下一代又隨時會行返「違法達義」嘅歪路。警方國安處今次執法行動，係對社會釋出訊息，如果有人涉嫌煽動仇恨政府、荼毒年輕人，絕對唔會坐視不理，相信會起到阻嚇同警惕作用。

其實今次涉案嘅「洗腦繪本」，一早被傳媒揭發過有問題，警方調查需時可以理解，但教育局都係責無旁貸，係咪都應該更主動咁去處理？教育局之前只係發指引，呼籲學校唔好採用有關「繪本」，其實係咪可以行多一步，主動派員跟進市面仲有無其他「洗腦書本」？如果每次都係出事之後，先至被動性咁處理，永遠落後於形勢，又點樣可以保護到純真嘅兒童同學生？

原圖：香港言語治療師總工會網頁

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk