美國近年不斷針對中國搞小動作，早幾日又搞大龍鳳，竟然無啦啦向香港發營商警告，話《港區國安法》為美企帶嚟嘅風險愈來愈大。點知話口未完，美國商會會長早泰娜就出聲支持香港，講到明香港仍然係營商好地方，仲話無跡象顯示國安法同商業法律有抵觸，唔建議在港美企撤資。美國商會嘅表態，完全係「大巴大巴」咁車落美國政府面上，再加上香港總商會亦提到，暫時無喺香港遇到好大營運風險，亦冇會員減少在港投資同營運。當本地同美國商界都認為本港營商環境無問題，華府發警告只係自欺欺人！

不會放棄香港這塊「肥豬肉」

美國抹黑、炒作《港區國安法》，其實已經唔係第一次，相信亦都唔會係最後一次。如果美國諗住透過發「商警」就可以動搖到香港嘅國際金融中心地位，恐怕未免過於天真。當「自己友」美國商會都同華府「唱反調」嗰陣，國際社會又點會信美國嘅所謂「商警」？一個無人會理嘅營商警告，咁發嚟仲有咩意義？

老實講，商人從來都「精甩尾」，對營商環境亦最敏感。如果香港經營環境真係有問題，點解依家都未拉大隊走人撤資？呢點咪就係證明咗，外資對香港前景充滿信心；既然留喺香港可以搵大錢，法治自由又有保證，當然就唔會走！事實上，美國依家喺香港，每年賺緊幾百億美元貿易嘅順差，再加眾所周知嘅，外資落戶香港，其實就係打入內地市場嘅跳板，內地市場咁大、有龐大嘅商機，外資、美企又點會願意放棄呢塊「肥豬肉」？

美國政府最影響營商環境

老老實實，身為美國商人，若然係要怕、要驚營商環境受影響，都應該會驚美國政府先啦。美國向來最唔守國際規則，就好似之前國際刑事法院考慮起訴多名涉嫌喺阿富汗虐待囚犯嘅美軍，美國竟然惡人先告狀，出手「制裁」國際刑事法院法官。

仲有，美國喺國際一向奉行霸道外交，動不動就出手玩單邊制裁、打關稅戰，呢啲先至係對營商最大影響，而唔係香港落實國安法囉。反觀中國，咁耐以嚟邊有試過好似美國咁霸凌其他國家？美國政府野蠻霸道，視國際協議、道義為無物，外資又點會唔驚先？

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk