區議會宣誓在即，引發議會歷來最大規模嘅「辭職潮」。港府今早刊憲，公布全港區議會共有214個議席出缺；仲有傳媒統計話，最近一星期有至少209名反對派議員辭職，連同之前已離任嘅，累計空缺議席已超過250個，超過議席總數嘅一半。廣男覺得，呢個局面係「有好有唔好」，好嘅係正常履行區議會職能嘅建制派，能夠喺部分區議會「翻盤」取回主導權，包括灣仔、九龍城等四區；不過，由於大量議員離任，部分地區嘅民生服務亦必須暫停，街坊難免受影響。就此，廣男想提出一啲建議，希望可以解決區議員服務「真空」嘅情況。

民間多走一步 互相補位

政府官員多次表明，政府無意短期內舉行區議會補選。換言之，區議會過半議席或將長期懸空，議會能否如常運作是一大疑問。按照「正常情況」，區議員有兩大職能，其一是就地區事務向政府提供意見；其二是為街坊提供民生及地區服務，如處理居民求助及針對地區事務嘅投訴等。

當然，區議員嘅角色絕非「獨一無二」，亦非無佢哋不可。單論地區諮詢組織，其實仲有各區撲滅罪行委員會、分區委員會等，都具有反映地區意見職能。上述兩個委員會成員嘅背景多元化，包括商場經理、非牟利機構代表、前區議員、非政府組織代表等，講到熟悉地區事務同專業範疇知識，佢比部分區議員更豐富。

至於地區服務方面，大量區議員離任、議辦關閉，無疑會對市民帶來不便，但影響只屬短期。唔好忘記，依家仲有不少地區工作者仍然默默付出，即使佢哋無公職在身，但熟悉社區事務同對工作有熱誠，一直為街坊排難解憂；加上不少社福團體、社區組織一直喺地區運作，不停為市民提供協助及支援，只要社區工作者同不同組織「一人多走一步」、互相補位，要填補區議員服務嘅空白處，一定唔係難事。

反對派遺害 不應由市民承受

反對派議員胡作非為嘅遺害，無理由要市民來承擔。民間要出力，政府亦須有承擔。各政策局及部門，包括民政事務局同勞工及福利局，都應該提供額外支援，甚至考慮增撥資源畀非牟利和社福團體，確保地區服務不受影響。與此同時，民政事務總署亦要好好準備，盡快增加人手以及宣傳，處理未來可能大幅增加嘅市民求助個案。

區議會未來嘅定位、職能如何，會否有轉變或改革，現階段仍屬未知之數。不過可以肯定嘅係，作為《基本法》規定嘅非政權區域組織，區議會未來必須聚焦民生、地區及福利工作，專注為街坊謀福祉，絕不可能過度介入政治紛爭，否則只會重蹈覆轍，令區域組織再度變成政治角力場，最終受苦嘅咪又係廣大香港市民。

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk