港大學生會評議會早前「玩火」，為七一刺警案「孤狼」默哀，仲通過動議「感激」佢為香港作出嘅「犧牲」。學生會見事件鬧大，急急腳道歉、辭職，同埋撤回動議。但正所謂覆水難收，事後認錯又有咩用？依家港大決定「大義滅親」，宣布不再承認學生會現時在校內嘅角色，公開同學生會割席；仲講到會嚴肅調查事件，再按結果對涉事學生作進一步處理。成件事一句講晒，就係學生代表「玩火自焚」，即使將來學生會成員要承擔後果，甚至被踢出校都好。廣男難聽啲講句，其實都係自己攞嚟嘅！

屢勸不聽 咎由自取

港大學生會之前已經成日做埋啲踩界嘢，早喺今年4月港大已經發過聲明，講明因為學生會近年行事日趨政治化，甚至公開發表具煽動性及可能違法嘅言論，所以已經停止代收會費同財政支援等。港大已經畀咗警告，但係佢哋一直置若罔聞，依家仲搞單咁嘅嘢，去悼念企圖殺警嘅兇徒。點解學生會評議會要「感激」兇徒，係咪想歌頌「孤狼」嘅惡行？又係咪有意或間接宣揚本土恐怖主義？佢哋做到咁離譜，唔係以為道歉認錯，就可以一筆勾消，當所有嘢都無發生過？

大學要嚴懲 警方要跟進

依家港大學生會評議會主席張敬生仲話，對校方決定感失望，質疑學生日後舉辦活動會有難度，或遇到更多審查云云。廣男覺得，先唔講件事本身同舉辦活動無關，就算日後港大對學生搞嘅活動睇得緊啲，咁樣又有咩問題？係咪港大見到學生活動有違規及違法風險，都要唔出聲同設法包庇佢哋？以事論事，今次學生代表犯下大錯，港大一定要嚴懲，如果輕易「放生」，豈不是變相鼓勵其他人「有樣學樣」？如果校方今次唔追究到底，呢股歪風繼續漫延落去，下一次有學生受煽動成為「孤狼」，咁又點算呢？另外，喺大學以外，以執法角度嚟講，如果有人宣揚恐怖主義、煽動恐怖活動都屬於犯罪。港大學生會評議會嘅行為，不少社會人士都認為或有觸犯《港區國安法》之嫌；對於呢一點，執法部門應該繼續跟進，如果有人涉嫌違法，就要果斷執法，就算對方喺學生一樣「無情講」。

依家港大學生會嘅問題，已經唔係道歉或者辭職可以解決得到，佢要為自己嘅行為負責。社會正關注事態發展，港大更加應該公正嚴謹處理，調查追究工作唔可以馬虎，仲應該做好國安教育，以免學生誤觸紅線。如果相關工作做得唔好，或者會有持反政府立場嘅學生，受極端思想影響同煽動，繼而進化成「孤狼」、恐怖分子，咁樣又係咪大家想見到嘅呢？

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk