齊上齊落、不割席、不篤灰、勿忘初心、堅持才見到希望 …… 自反修運動以來，反對派政客以至支持者「創造」出無數「激勵人心」嘅口號，一次又一次將運動（或者暴力行動）提升到頂峰；佢哋一鼓作氣，喺2019年11月嘅區議會「大勝」，甚至想將氣勢延續至立法會選舉，實現「攬炒大計」。可惜，佢哋算漏咗兩樣嘢，第一係警方堅毅不屈地執法，佢哋始終「攻不下」香港；第二係中央維護香港穩定嘅決心，所以中央先制定《港區國安法》，之後又完善香港選舉制度。近日，一班反對派區議員相繼辭職，敗走區議會，廣男嘅睇法好簡單，既然玩火，當然就要承擔後果！

相繼有反對派區議員辭職

近日，有傳媒引述消息，預計約230名區議員不符宣誓要求，或將被DQ、追討上任起至今所有薪津，預料每人涉及金額一百萬元，但辭職者唔會被追討；據報，至少有22個反對派區議員已經辭職，廣男睇相關新聞，包括有九龍城區議會主席鄺葆賢（九龍城黃埔西）、李傲然（油尖旺大角咀北）、陳樹英（屯門兆康）等人；相關人士，唔係反政府嘅堅實分子咩？依家有消息指被DQ會被追討薪津就辭職？唔通集體辭職先係「齊上齊落」嘅真正意義？

回想起反修例運動期間，一眾反對派政客，包括後來成為區議員嘅政客，高調支持暴徒、高呼「光時」口號（「港獨」口號），又攬炒議會將一個又一個區議會變成「政治鬥爭」場地，以為無代價？錯喇，中央絕對唔會任由香港亂，港府亦不可能不處理有議員唔擁護《基本法》、唔效忠特區嘅問題；今日一眾反對派議員弄得如斯田地，都係自招惡果。

辭職保「薪津」？

至於消息指辭職者唔會被追討薪津，廣男對呢點就有啲保留，因為不論反對派議員是否辭職，只要佢哋喺擔任議員期間有任何不擁護《基本法》、不效忠特區嘅言行，理論上除咗被DQ，仲可以被追討薪津；所以今日辭咗職，都唔一定無「手尾跟」。

2019年底，一眾反對派政客喺區議會選舉勝選，當時已經有社會人士講過，佢哋只知結果而不知後果，今日一眾反對派議員「玩過火」，然後話自己「身體與情緒難以支撐下去」、「未能完成大家的托付」？算吧啦，其實反對派政客「有著數」就出，「無著數」就縮，今日完敗，只能怪自己想攬炒香港，最後卻攬炒咗自己。 

圖片來源：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk