七一回歸日當天，銅鑼灣發生咗一宗前所未有嘅「孤狼」襲警案，「孤案」從後用刀插傷警員後自插「自盡」。事後，竟然有人同情、支持甚至「悼念」兇徒，囍雨今日睇新聞，見到香港大學學生會評議會，竟然喺開會前先為其「默哀一分鐘」，繼而通過動議向兇徒表示哀悼；佢哋知唔知，自己哀悼緊嘅，係一個發動自殺式恐襲嘅人？作為學生代表，竟然間接宣揚極端暴力行為？

校方只懂譴責？

對於呢班大學生代表嘅「極端」言行，喺網絡上引來極多負評，甚至有人狠批「喪盡天良嘅所謂大學生」，亦有網民指出評議會已經「成為眼中釘、黑名單」。值得留意嘅係，香港大學發言人回應事件時，有強烈譴責相關同學，有譴責任何暴力，並反對任何宣揚同合理化暴力嘅言論同行為；問題嚟喇，咁校方除咗譴責，有冇實際行動回應呢？

坦白講，一班學生代表要「哀悼」嘅人，唔係一般市民，唔係無辜受害人，甚至唔係一般罪犯，而係意圖殺警嘅極端暴力分子，如果一個意圖殺人嘅兇徒被「哀悼」，囍雨首先會質疑呢班學生代表，到底仲有冇良知？同樣重要嘅問題係，當連一間大學嘅學生代表都以言行「支持」兇徒行為，咁會唔會令更多人去仿效呢？萬一有港大學生又想做「一秒英雄」（反政府人士把兇徒「英雄化」），咁咪即係又有死傷？

教職員、學生都有問題！

「孤狼」向警員施襲案之外，近日警方又破獲一宗有人意圖發動炸彈襲擊的案件，據報「金主」更為一名大學教職員，將不同事件包括今次港大學生評議會「哀悼」兇徒一併分析，大家唔難發現，原來自修例運動開始，香港嘅大學嘅學生以至教職員，大部分都有問題！喺呢個情況底下，點解一眾大學管理層仲要避得就避，仲想「無為而治」呢？

今日有大學生代表同情或支持兇徒，極端思想發酵下去，佢哋、身邊人以至後輩，就可能成為下一個「孤狼」或者「炸彈狂徒」；可能因為呢班學生今日仲未因違法達義而招致刑責，所以可以喺度「下巴輕輕」，但「玩火」，遲早有日「玩出火」；至於港大校方，出個聲明譴責學生，有幾大作用？如果他日有港大學生成為「孤狼」、炸彈狂徒，甚至恐怖分子，到時已經出現人命傷亡，校方到時想做嘢？太遲喇！ 

圖片來源：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk