今日警方國安處又偵破一單大案，喺尖沙咀彌敦道一間賓館內，搗破激進「港獨」組織「光城者」嘅土製炸彈實驗室，拘捕5男4女，涉違《港區國安法》中嘅恐怖活動罪。根據警方所講，組織原本計劃喺本月上旬發動TATP土製炸彈襲擊，針對鐵路及海底隧道等公共設施施襲，企圖造成大量市民傷亡；今次警方嘅行動，等於成功解除咗一場或多場潛在嘅恐怖襲擊。比起警方之前破獲嘅爆炸品案，今次案件性質更為複雜同嚴重，行動背後分工精細、有金主、完整計劃，甚至涉及「港獨」組織。到底香港仲有幾多類似嘅組織秘密運作緊？香港嘅恐襲威脅已經「殺到埋身」？

 

分工仔細 招攬中學生犯案

 

今次案件有幾點值得留意，與之前嘅同類案件相比，似乎今次佢哋更有組織同計劃性。首先， 團伙各人有不同分工，有人負責採購化學物料、製造炸彈及負責放置炸彈的「行動組」，甚至「勘察組」等。根據警方透露，有關計劃已經去到實踐階段，有資金、有行動指南，仲有成員到過兩間法庭「踩線」視察。根據警方透露，喺現場搜出嘅行動指南中，顯示團伙企圖發動炸彈恐襲，動機更提及「香港獨立」訴求等字眼。更為離譜嘅係，該團伙仲主要招攬打算離港嘅中學生去犯案，完事後即刻安排佢哋離開香港。

 

恐襲威脅不容忽視 

 

囍雨想講，之前銅鑼灣刺警恐襲案，有人話用「本土恐怖襲擊」形容事件可能有啲「誇張」，咁今次事件佢哋又點睇？搜到炸藥、爆炸品，仲有行動指南等等，如果炸彈恐襲真係成事，兇徒喺鬧市引爆炸彈，肯定會造成唔少人命傷亡。涉案組織「光城者」仲專搵「中學生」做行動者，到底有無良心？先唔講煽動學生犯法嘅問題，如果爆炸品稍有差池，隨時危及學生性命安全。佢哋當學生係棋子看待，懶理佢哋嘅死活？

 

「光城者」嘅行動目的之一，似乎係為爭取「港獨」。今次事件更令人憂心嘅係，「港獨派」係咪已經漸轉激進化？受制於《港區國安法》，行動不能名目張膽進行，所以轉為地下化、極端化，企圖用恐襲、暴力手段，迫使港府及中央「答應訴求」？如果係咁，本土恐怖襲擊、「孤狼式恐襲」係咪可能仲會陸續有嚟？

由早前刺警恐襲到今次案件，說明社會上仍然有人伺機而動，潛在恐襲威脅同風險絕對不容忽視。大家要留意一點，兇徒嘅目標可能唔止針對警察，廣大嘅香港市民都可能受到牽連，絕對唔可以掉以輕心，以為一定「唔關自己事」。炸彈無眼，下一個受害者隨時係任何一個市民同埋佢嘅家人！

原圖：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk