《生果報》停運、壹傳媒原本表示停運之後又「改口」，對於反對派而言，佢哋「失去」咗《生果報》，甚至有人認為佢哋已經失去言論同新聞自由；記協前主席楊健興，總結過去一年嘅傳媒變化，稱最實質係失去咗壹傳媒、《生果報》，形容《生果報》敢於觸碰敏感題目、調查報道等，具象徵及重要，擴散出嚟嘅影響令恐懼氣氛急促惡化云云。廣男好奇，到底失去壹傳媒會令恐懼擴散，定係壹傳媒本身先係擴散恐懼嘅源頭呢？
反對派的舊招數
廣男認為，楊健興之說，完全秉承咗反對派政客嘅一貫技巧，就係將啲嘢掉返轉嚟講，然後扮到好有「道理」咁，就如上述佢指失去壹傳媒、《生果報》令「擴散出來的影響令恐懼氣氛急促惡化」，講到無咗《生果報》，會有好多負面影響咁，但廣男反而要問，《生果報》干政、播淫甚至造假，呢啲嘢唔係先產生壞影響咩？再者，講到恐懼，當初又係咩媒體抹黑《逃犯條例》修訂，最終有份促成暴力不斷嘅反修例運動呢？
最近有「孤狼」意圖謀殺警員，有消息指涉案「孤狼」唔單止喺《生果報》做過，而且家中藏有大量《生果報》剪報，廣男真係想同楊健興商榷下，問下香港人常看《生果報》，被其荼毒是否「弊多於利」；《生果報》過往嘅所作所為，雖然係打著民主、自由旗幟，但無論係煽動抗爭定造假新聞，根本都係散播緊恐懼甚至禍及緊香港，今日記協前主席如此高調歌頌《生果報》，廣男想問下，多年來受《生果報》傷害過嘅人或者機構，情何以堪呢？
請反對派正視問題
最後，廣男留意到論及《生果報》。楊健興形容「《蘋果》數十篇文章出事，造成『好大心理陰影』，其他媒體亦可能有類近文章，不知會否被翻出」，楊健興言下之意，即係其他媒體都有類似文章，可能觸犯《港區國安法》？如是這般，廣男真係想請楊健興講清講楚，等警方可以跟進。不過，廣男相信楊健興唔會咁做，因為，佢根本就係反對派一份子！
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論