隨住《生果報》噚日出版最後一份報紙，荼毒咗香港市民26年嘅《生果報》終於都「執」；喺各界為《生果報》蓋棺作論嘅時候，我哋見到反對派人士、傳媒人以至外國勢力都紛紛發聲「撐」《生果報》，近日，連美國總統拜登都發聲明，指北京打壓獨立傳媒，要求釋放被捕新聞工作者云云。據報，今次係拜登上任以來第一次就香港議題單獨發聲明。對於拜登撐《生果報》，囍雨最好奇嘅係，乜拜登父子唔係俾黎智英或者其「前」助手Mark Simon造假抹黑過咩？拜登依家係咪為敵人「站台」？

新聞自由悲傷的一天？

拜登嘅聲明指，當日係香港與全球新聞自由悲傷嘅一天，又稱北京對香港嘅打壓力度有增無減，令《生果報》停止運作，表示「透過懲罰自由言論的《國安法》進行拘捕、恐嚇，北京堅持用權力打壓獨立傳媒及消滅異見」；美國政府更要求釋放被捕新聞工作者，揚言「新聞工作不是罪」。

從事新聞工作，當然不是罪，但如果新聞工作者涉嫌犯罪，好明顯就係另一回事喇！《生果報》幾位董事、高層，唔係單純「做新聞」被捕，而係佢哋管理下嘅《生果報》，有文章涉嫌違反《港區國安法》，既然有人涉嫌違法，警方就要執法；由此伸延下去，事件當然亦與新聞自由無關。換個角度諗件事，如果喺美國有新聞工作者涉嫌犯下叛國罪，難道又會因為身份而「無罪」、免受拘捕及立即釋放嗎？

拜登父子也曾受害

因為《生果報》嘅干政、造假以至播淫，香港多年來已經有無數嘅受害者，但講真，其實拜登父子都係《生果報》或者黎智英、其前助手Mark Simon涉嫌造假嘅受害者喎！大半年前，當時拜登仲未勝選成為美國總統，當時就有美媒爆料，話一份關於拜登同佢個仔亨特喺中國生意嘅「情報」文件涉及造假，而發布者聲稱由香港《生果報》委託撰寫，之後雖然《生果報》否認，但黎智英之後就表示過，其時任助手Mark Simon有參與其中，用嘅錢更係黎智英私人公司嘅錢。簡單嚟講，就係黎智英或者Mark Simon搞過拜登父子，今日拜登為《生果報》「發聲」，好聽啲講，叫寬宏大量；直接啲講，叫善惡不分。

不論外國勢力甚至美國總統如何力挺《生果報》，都改變唔到《生果報》董事、高層以至公司本身涉嫌違法，令自己經營困難嘅事實。其實，相似甚至更嚴厲嘅國安法，美國自己都有，為咗咩要針對中國、香港呢？因為香港由始至終，都係用以打擊中國嘅工具？美國仲想用呢招？算吧啦！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk