26年前，《生果報》橫空面世，改變咗香港嘅媒體生態，甚至改變咗好多年輕人嘅「心態」，有人認為，《生果報》支持民主、自由，係反對派人士不可或缺嘅「精神讀物」；亦人認為，《生果報》多年來造假、播淫、煽暴同干政，根本就係香港媒體嘅毒瘤。囍雨睇法好簡單，從道德層面睇，如果有媒體係誨淫誨盜嘅，佢嘅存在意義絕對係負面嘅；從法律層面睇，媒體以至媒體人，無特權可以唔守法。今日《生果報》「告終」，終結其生命嘅，唔係政府或執法部門，而係執迷不悟嘅《生果報》老闆以至管理層先真！

別再說新聞自由好嗎？

打開今日《生果報》嘅「最終章」，有一篇題為《給香港人的告別》嘅「蘋論」，呢篇同讀者告別嘅文章，相當感性，相信會觸動到唔少《生果報》嘅支持者，但囍雨必須講句，佢入面部分內容，完全站唔住陣腳，包括稱「《蘋果》死亡，新聞自由是暴政的犧牲品」、「尤其是在白色恐怖下，仍然撐到最後」等等。

關於新聞自由嘅問題，請讓囍雨不厭其煩地講句，有新聞自由，不等於可以為所欲為，最基本嘅底線，當然係傳媒應顧及傳媒道德，不播淫、不造假係必須嘅事；另一條底線，當然係法律底線，今日《生果報》之所以要「執」，係因為其高層甚至報章本身涉違法，資金被凍結以至出現經營困難，如果話新聞自由係「犧牲品」，不如話有人涉違法，執法部門就要執法，一切皆是《生果報》咎由自取？

至於白色恐怖嘅問題，《生果報》老闆、高層被捕，以至報館被搜，到底所為何事？最簡單嘅質疑，就係其他傳媒有冇好似《生果報》咁，干政干得如此深入，不斷叫人上街反政府、反中央？又或者，其他媒體有冇大字標題叫香港人一齊去信、要求外國總統干預香港事務？又有冇傳媒老闆明言自己為外國而戰？如果講到恐怖，當新聞機構表現到如同反中央嘅政治組織一樣，先係真正恐怖！

沒有《生果》的世界

喺同一篇「蘋論」中，撰文者陳沛敏指有讀者以至香港人話「香港唔可以冇咗蘋果」，從反對派陣營而言，佢哋唔可以無咗《生果報》，但囍雨又要反問，香港無咗一份干政、煽暴、播淫、造假嘅媒體，有咩問題？因為聲稱爭取民主、自由，就做錯乜都值得存在，要繼續營運落去？今日《生果報》倒閉，有人唏噓萬分，有人感到婉惜，但囍雨想起因為「錯信」《生果報》而走上街頭、繼而被捕甚至坐監嘅年輕人，《生果報》結業，意味香港少咗一家媒體荼毒年輕人，囍雨唔認為係壞事。 

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk