不論《生果報》之前喺反對派裡面如何呼風喚雨，《生果報》公布出埋聽日報紙就會停運，所以近幾日，不論係建制抑或反對派，都開始幫《生果報》做「總結」，囍雨亦曾經以「干政」、「淫」同「假」嚟形容《生果報》；至於《生果報》以至反對派，當然係將《生果報》有咁高捧咁高，今日囍雨睇《生果報》，見佢哋嘅專欄作家李怡以《失敗者回憶錄：《蘋果》的成功與失敗》為題，歌頌自己公司「在中文報業史上，應留下商人辦報勝於文人辦報的成功經驗」，臨別秋波不忘托黎智英大腳。其實，黎智英用商人思維辦報，結果就係以「吸睛」、銷量行先，結果令《生果報》連半點傳媒道德都欠奉；而黎智英帶領《生果報》搞政治，甚至涉嫌勾結外國勢力，直接令《生果報》要「收檔」，根本就係咎由自取！

李怡盡地一「擦」

囍雨嘗試用李怡嘅文章，去剖析反對派以至《生果報》人士係點睇近日發生嘅事。綜觀李怡呢篇文，就係先抹黑政府、再歌頌《生果報》。例如喺文章頭段，佢就稱「（生果報）終於不得不停刊，則眾所周知是極權插手，香港禮崩樂壞、人權不保、法治蕩然的結果」；之後講到《生果報》出版，佢就稱「面世時，令人耳目一新，它不是哪一個總編輯的面孔，而是一切以顧客的需要為依歸的成功商人的面孔」；最後總結《生果報》，佢更稱「壹傳媒在香港的出現，在中文報業史上，應留下商人辦報勝於文人辦報的成功經驗，或許可以同張季鸞1926年入主《大公報》創造的輝煌相比美」。好一個李怡，文過飾非，連歌頌自己公司或老闆，都「不同凡響」。

不過，囍雨並唔同意李怡所講嘅嘢，《生果報》要停刊問題，追本溯源，係因為《生果報》董事甚至《生果報》本身涉嫌違法，所以有資金被凍結，出現經營困難，同禮崩樂壞無關係，甚至可以話一切都係《生果報》自己「攞嚟」。至於話《生果報》面世時「令人耳目一新」，囍雨又想講，《生果報》成日造假新聞，例如俾錢陳健康北上召妓、再炮製「頭條新聞」，當然令人「耳目一新」，因為無人諗過，竟然會有傳媒咁樣用錢造假新聞；《生果報》絕對係香港假新聞嘅鼻祖！最後，講到「留下商人辦報勝於文人辦報的成功經驗」，囍雨想問，成功係點定義嘅呢？如果話計銷量、人氣，《生果報》可能係「成功」；但如果講傳媒道德，講守法意識，《生果報》係成功定失敗呢？囍雨就覺得係完全失敗！

《生果報》走到終點 港媒重新出發

今日，《生果報》即將走到終點，反對派人士覺得陣營失去一個平台，但對傳媒行業以至香港嚟講，其實係一件好事。如果其他媒體能避免《生果報》嘅不道德甚至不守法，好好咁處理各樣新聞，我哋唔會再見到「干政」、「造假」、「淫褻」嘅媒體；自反修例運動以來，香港真係失去太多，今日我哋同《生果報》說再見，亦意味傳媒行業可以重新出發，香港市民可以免受荼毒。 

原圖:RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk