英國BNO簽證今年1月底接受申請，唔少人都「滿懷希望」地離開香港、移居英國。不過，實際往往不如想像咁美好，最近《泰晤士報》就訪問咗幾名移英港人，當中有人訴說「新生活麻煩」，不論係求職定係租屋都遇到困難。廣男覺得事情好簡單，英國不論係經濟、職場以至生活文化都同香港大相逕庭，如果諗住「有自由」空氣就乜都得，呢種想法無疑係「太天真」！

英國政府無支援？

據報，37歲嘅Aragorn因為過去喺香港目睹示威場面，令佢決定要離開香港，佢擔心香港警方或國安人員會因此「針對」佢，又擔心喺英國會俾當地嘅中國人認出，令佢面臨人身風險同影響工作機會；不過，去到英國，佢喺求職方面就困難重重，搵唔到寫字樓工作，想做經紀又遇上「封城」 … 佢感覺自己一個人，睇唔到英國政府有任何協助。另一受訪者、23歲護理系學生舊年年尾去英國，形容「香港對年輕人來說已不安全。警察要我們停下檢查身份證及袋子，我們只是在街上行走」，原來喺英國租屋需要通過信貸紀錄，佢話缺乏信貸紀錄係普遍移英港人遇到嘅難題，有業主甚至連預繳一整年租金都唔接受云云。簡單嚟講，就係即使英國有「自由」、「清新」空氣，移英港人生活上遇上多多麻煩。

對於唔同嘅移英港人遇上不同問題，廣男首先會認為，依家係港人要移民去英國，點解英國一定會「幫到手」呢？退一步講，就算港人依家可以用BNO移居，英政府將撥款4.6億港元去幫助移英港人，但大家要認清兩點，第一係所謂BNO 5+1，如果香港人移居英國錢用曬，最後會唔會攞唔到永久居留權？或者搵唔到工，有永久居留權都無用呢？第二，4.6億港元，如果有十萬港人移居英國，用最簡單嘅除法，每人平均得到4,600港元資助，呢個數，可能連交半個月租金都唔夠。冀望英國政府會幫到手，或者認為去到英國所有問題會「迎刃而解」，想法明顯係「太樂觀」。

不怕被歧視嗎？

依家唔少要移民英國嘅人，好多都係聲言不滿香港嘅「政治環境」而移民，但英國果邊經濟咁差，如果港人要同英國人「爭工做」，明顯係輸蝕；再者，就算搵到工，據報交稅等等會無咗30至40%，仲有幾多錢剩？更為重要嘅係，其實大家有冇諗過英國人會歧視香港人、華人呢？如果覺得「自由空氣」最緊要，廣男都係果句，與其挽留，不如歡送！

原圖:視覺中國

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk