最近，廣男同身邊朋友又再討論起置業問題，朋友由本來打算入市，變成望門興嘆，當中原因，就係樓價近幾個月不斷上升，朋友睇中嘅單位，短短數個月已經升咗幾十萬，即係首期要俾多啲，壓力測試難過啲，就算買到又要每個月「供多啲」；廣男一早都講過，一切問題，包括公屋、居屋供應不足，以至私樓價格迫近歷史高位，都係土地問題，如果做唔好供應，問題只會繼續惡化。執筆之時，廣男就睇到有新聞指房委會上年公屋編配「不達標」嘅新聞；似乎，公營房屋以至私樓供應落後，已經成為香港嘅「新常態」，以十萬甚至以百萬計嘅港人，只能繼續受苦。

消失的公屋單位

有傳媒報道，房委會2020/21年度原先估算可編配31,400個公屋單位，但實際編配數字為23,179個，達標率只有73.8%；房委會解釋，編配數目嘅落差主要因為有原本喺上述年度落成嘅屋邨延至2021/22年度落成，加上疫情又影響了編配進度。廣男覺得，估算可編配同實際編配嘅公屋單位相去甚遠，影響可能超過8,000個家庭，情況絕對係唔樂觀。

雖然房委會估算下個年度嘅編配單位超過30,000個，但結果會唔會都係唔達標，依家真係講唔埋；眼前嘅實況係，土地供應、公屋規劃嘅工作出現有問題，結果公屋輪候冊嘅宗數就不斷上升，最有效嘅方法，就係全力增加土地供應，當土地供應充足，可以興建大量嘅公營房屋，理論上公屋編配唔止可以達標，甚至有望超標。

土地問題 空談誤港

關於土地問題，近幾年由「土地大辯論」，到早前前特首梁振英提出喺大攬郊野公園邊陲地興建居屋，其實社會已經討論咗好耐，但除咗非常之「遙遠」嘅明日大嶼計劃，廣男其實睇唔到有短中期而又有一定規模嘅拓地計劃。坦白講，填海雖好但太遙遠；棕地可以發展，但難度唔低。梁振英嘅計劃，廣男認為至少有兩大作用，第一就係如果事成，至少25,000個家庭以及過千名老人家可以有安定居所；第二就係社會願意去探討、接納唔同嘅土地選項，方方面面去覓地建屋，先係解決香港土地荒嘅最負責任做法。今日，唔理係公屋建屋、編配量少，居屋供應「極罕」以至私樓價格就「破頂」，從經濟學角度睇，都係供應問題。香港社會各界其實唔係唔知道問題，而係欠缺一份雷厲風行去解決問題嘅決心。 

圖片來源：政府新聞處

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk